BUU Qaýipsizdik keńesiniń koronavirýsqa bailanysty rezoliýtsiiasynyń qabyldanbaýyna Qytai men AQSh diplomattary arasyndaǵy kelispeýshilik sebep bolyp otyr dep habarlandy. Eki memleket diplomattary rezoliýtsiiada Dúniejúzilik densaýlyq saqtaý uiymyn (DDSU) ataý máselesine kelgende ortaq mámilege kele almaǵan.
AQSh Qaýipsizdik keńesiniń qujatynda uiymǵa silteme jasalmaǵanyn qalaidy. Al Qytai DDSU atyn qaldyrýdy talap etip otyr.
Aty-jónin atamaǵan birneshe diplomatqa silteme jasaǵan Reuters agenttiginiń jazýynsha, másele pandemiia kezinde qaqtyǵysty toqtatý týraly BUU qararynda bolyp otyr. Qaýipsizdik keńesiniń 15 múshesi 23 naýryzda BUU bas hatshysy Antonio Gýterrish alǵash ret qozǵaǵan indet kezinde atysty toqtatý týraly qarar mátinin kelisýge tyrysqan. Rezoliýtsiiada DDSU ornyna “mamandanǵan densaýlyq saqtaý mekemesi” degen sóz qoldanylǵan. Biraq AQSh bul DDSU-ny tikelei meńzeidi dep tujyrymmen kelispegen.
BUU Qaýipsizdik keńesiniń turaqty múshelerine Ulybritaniia, Qytai, Resei, AQSh jáne Frantsiia kiredi.
Buǵan deiin AQSh prezidenti Donald Tramp DDSU-ny "óz mindetin durys atqarmady, indettiń taraýyna jol berdi" dep aiyptap, uiymdy qarjylandyrýdy ýaqytsha toqtatqan. Prezidenttiń pikirinshe, BUU qurylymyna qarasty uiym Qytaidan túsken habarlamalardy muqiiat zerttegen bolsa, indettiń taraýyna jol bermei, talai adamnyń ómirin saqtap qalar edi. Al BUU-nyń bas hatshysy Antonio Gýterrish qazir koronavirýspen kúresip jatqan kez kelgen gýmanitarlyq uiymdy qarjylandyrýdy toqtatyn mezgil emes dep málimdegen.
AQSh biligi koronavirýstyń jańa túri Qytaidyń Ýhan qalasyndaǵy zerthanadan kezdeisoq taraǵan bolýy múmkin dep boljaidy. Pekin muny joqqa shyǵarady.
