AQSh prezidenti Donald Tramp pen Soltústik Koreia prezidenti Kim Chen Ynnyń sársenbi kúni Vetnamda bolǵan iskerlik túski asy keiinge shegerilgen. Donald Tramp pen Kim Chen Yn eki kúndik kezdesýde ózara kelisimge kele almaǵan, dep habarlaidy Aq úi.
AQSh prezidenti Donald Tramp pen KHDR tóraǵasy Kim Chen Ynnyń Hanoida ótken kezdesýi «jaqsy ári konstrýktivti» bolǵan. Bul týraly eki eldiń basshysy málimdedi. «Qazir eki jaq kelisimge kelgen joq, biraq olardyń komandalary muny asyǵa kútip otyr», delingen Aq úidiń habarlamasynda.
Kezdesý nátijesine súiensek, eki jaqty deklaratsiiaǵa qol qoiylmaýy múmkin. Al sammit baǵdarlamasy belgilengen ýaqyttan erterek aiaqtalady dep boljam jasalyp otyr.
Soltústik Koreianyń denýklearizatsiialanýy múmkin be?
Buǵan deiin Kim Chen Yn AQSh prezidenti Donald Tramppen ekinshi kúni kezdesýde iadrolyq qarýdan bas tartýǵa daiyn ekenin málimdegen bolatyn. Qos basshy da dóńgelek ústelde pikir almasyp, denýklearizatsiiaǵa qatysty ortaq sheshimge kelýge tyrysty.
«Iadrolyq qarýdan bas tartýǵa daiynsyz ba?» degen jýrnalisterdiń suraǵyna Kim Chen Yn: «Eger men daiyn bolmasam, munda kelmes edim», dep jaýap bergen. Alaida, Soltústik Koreia basshysy denýklearizatsiiany qalai júzege asyratynyn jáne qandai sharalar qoldanatynyn ashyp aitpady.
AQSh óz tarapynan KHDR-diń iadrolyq qarýdan tolyǵymen bas tartqanyn, al KHDR búginde AQSh-tyń aziialyq odaqtastaryn – Ońtústik Koreia men Japoniiany – qorǵap turǵan iadrolyq qalqanynan bas tartqanyn qalaidy.
Tramptyń sózine súiensek, Soltústik Koreianyń denýklearizatsiiasyna asyǵýdyń qajeti joq.
«Áýel bastan men ýaqytty tezdetýdiń mańyzdy emes ekenin aitqan bolatynmyn. Iadrolyq raketalardy synaqtan ótkizý doǵarylǵanyn óte joǵary baǵalaimyn. Kim myrza ekeýmiz durys kelisim jasaǵymyz keledi», dedi ol.
Kim Chen Ynnyń Tramppen kelisim-shartqa qol qoiý máselesi jumbaq kúide qaldy.
«Áli bir nárse aitýǵa erte. Biraq, men pessimist emespin. Bizde jaqsy nátije bolady dep oilaimyn», dedi Kim Chen Yn.
Jýrnalisterdiń Kim Chen Ynǵa qarata qoiylǵan «Adam quqyqtary týraly másele talqylandy ma?» degen suraǵyna Tramp: «Bárin talqyladyq», dep jaýap berdi.
«Bizde prodýktivti pikirtalas boldy. Qarym-qatynasymyz ádettegidei, múmkin odan áldeqaida jaqsy», dedi ol.
Saltanat Shynádil
