Foto: ashyq derekkóz
AQSh Iranmen bir ailyq "sheńberlik kelisimge" kelý baǵytynda jumys istep jatyr. Osy ýaqyt ishinde soǵysty toqtatý boiynsha kelissózder júrgiziledi. Bul týraly Izraildiń 12-arnasy úsh derekkózge silteme jasap habarlady.
Málimetke sáikes, Gazadaǵy HAMAS pen Livandaǵy "Hezbollaǵa" qatysty jaǵdaidaǵydai, bul tetikti ázirleýmen Tramptyń arnaiy ókilderi Ýitkoff pen Kýshner ainalysyp jatyr.
Jospar boiynsha, bir ailyq bitim jariialanǵannan keiin Vashington men Tegeran soǵysty tolyq toqtatýǵa arnalǵan 15 tarmaqtan turatyn jospardy talqylai bastaidy. AQSh usynǵan sharttar tómendegidei:
▪️ Jinalyp qalǵan iadrolyq áleýetti tolyq joiý;
▪️ Iran eshqashan iadrolyq qarý ázirlemeitini týraly mindetteme qabyldaý;
▪️ Iran aýmaǵynda ýran baiytýǵa tyiym salý;
▪️ Baiytylǵan barlyq material taraptar kelisetin keste boiynsha MAGATE-ge beriledi;
▪️ Natanz, Isfahan jáne Fordo nysandary jabylyp, joiylady;
▪️ MAGATE-ge Iran aýmaǵyndaǵy barlyq aqparatqa tolyq qoljetimdilik berý;
▪️ Aimaqtaǵy proksi toptardy qarjylandyrý men qarýlandyrýdy toqtatý;
▪️ Ormýz buǵazynda erkin keme qatynasyn qamtamasyz etý, ony buǵattaýǵa tyiym salý;
▪️ Zymyrandardyń sany men ushý qashyqtyǵyn shekteý (naqty parametrler keiin talqylanady);
▪️ Bolashaqta qarýdy tek qorǵanys maqsatynda paidalaný.
Óz kezeginde Iran mynadai jeńildikter alady:
▪️ Barlyq sanktsiialardyń kúshin joiý;
▪️ Býsherdegi beibit atom energetikasyn damytýǵa kómek (elektr energiiasyn óndirý úshin);
▪️ Halyqaralyq sanktsiialardy avtomatty túrde qaita engizý qaýpin alyp tastaý.
Atalǵan stsenarii Izrailde alańdaýshylyq týǵyzýda. Sebebi Tegeran negizgi máseleler tolyq sheshilmei-aq qaqtyǵysty toqtatyp, "utyp ketýi múmkin" degen qaýip bar. Sonymen qatar, arna Irannyń bul sharttarǵa kelisý yqtimaldyǵy tómen ekenin atap ótedi. Degenmen AQSh pen Iran jalpy bir sheńberlik kelisimge kelip, naqty tetikterin keiinge qaldyrýy da múmkin ekeni aitylyp otyr.
