AQSh pen Germaniia "Soltústik aǵys-2" jobasyn sanktsiiasyz aiaqtaý jóninde kelisimge keldi. Bul jóninde AQSh memlekettik hatshysynyń orynbasary Viktoriia Nýland málimdedi.
Onyń sózinshe, Vashington men Berlin Resei gazyn Ýkraina arqyly tasymaldaý jobasyn 10 jylǵa sozady. Qazirgi qoldanystaǵy kelisim merzimi 2024 jylǵa deiin bolǵan.
Nýland AQSh pen Germaniia Ýkrainanyń Resei gazyna táýeldiligin barynsha azaitýǵa tyrysamyz dep atap ótti. Budan bólek, eger Máskeý kórshi elderge energiia resýrstary arqyly qysym jasaityn bolsa, Germaniia sanktsiia salady.
Ýkraina energiia resýrsyn diversifikatsiialaý úshin Berlin men Vashingtonnan qarjylai kómek alady.
Resei prezidenti Vladimir Pýtin men Germaniia kantsleri Angela Merkel telefon arqyly sóilesken kezde, "Soltústik aǵys-2" jobasy qurylysynyń aiaqtalýǵa jaqyn ekenin, qurylys jumysyna kóńili tolatynyn jetkizgen. Bul jóninde Kremldiń baspasóz qyzmeti habarlady.
"Soltústik aǵys – 2" jobasynyń qurylysy 2016 jyly bastalǵan. Qurylys 2019 jyly aiaqtalýy tiis bolǵan, biraq AQSh sanktsiiasy qaýpinen toqtap qalǵan.
2021 jyldyń basynda qurylys jumysy qaita jalǵasty.
Vashington Reseiden Germaniiaǵa tikelei tasymaldanatyn gaz kólemin eki ese arttyrýǵa arnalǵan "Soltústik aǵys-2" qubyr jobasy Batys Eýropany Reseidiń tabiǵi energiia resýrstaryna táýeldiligin burynǵydan da kúsheite túsedi dep qaýiptenedi. AQSh Eýropa Odaǵyna suiyltylǵan gaz jetkizýge daiyn ekenin jáne odaq elderiniń infraqurylymyna aqsha quiatynyn aitqan.
