AQSh kongresiniń Ókilder palatasy 11 qańtarda prezident Donald Trampqa impichment jariialaý týraly rezoliýtsiianyń mátinin jariialady. Rezoliýtsiia boiynsha, Tramp "búlik uiymdastyrmaq boldy", "AQSh pen úkimet institýttarynyń qaýipsizdigine qater tóndirdi" dep aiyptaldy.
6 qańtarda Tramptyń ashýly jaqtastary Kapitoliige basyp kirip, oqiǵadan bes adam qaza tapqan.
Donald Tramptyń prezidenttik mandaty 20 qańtarda aiaqtalady. Osy kúni jańa sailanǵan prezident Djo Baidenniń inaýgýratsiiasy ótedi.
13-14 qańtarda rezoliýtsiia qujaty talqylanyp, keiin Ókilder palatasy impichmentke daýys berýi tiis. Ókilder palatasy impichmentti jaqtap daýys berse, keiin ony senat qaraidy. Eger senat Trampqa impichmentti qoldasa, ol prezident sailaýyna túse almaidy.
6 qańtarda, Kongrestiń prezident sailaýynyń daýys berý nátijesin maquldaý otyrysy aldynda, Tramp Aq úi janynda óz jaqtastaryna qaiyrylyp, "biz eshqashan berilmeimiz, eshqashan jeńilmeimiz" degen edi.
Tramptyń osy sózinen keiin onyń ashýly jaqtastary 1,6 shaqyrym jerde ornalasqan Kapitoliige baryp, basyp kirdi. Olar Kongrestiń sailaý nátijesin rásimdeý protsesine kedergi keltirdi. Saiasatkerler jiyn ótetin zaldy tastap ketýge májbúr boldy. Kongress jumysyn Vashingtonda komendanttyq saǵat engen soń jalǵastyryp, keiin Baidenniń jeńisin maquldady.
9 qarashadaǵy sailaýda Baiden sailaýshylar alqasynyń 306 daýysyn, Donald Tramp 270 daýysyn alǵan. Keiin Tramp sailaý nátijesimen kelispeitinin aityp, sotqa shaǵym túsirgen. Sot onyń 50 aryzyn qanaǵattandyrmai tastady.
