اقش كونگرەسٸنٸڭ ٶكٸلدەر پالاتاسى 11 قاڭتاردا پرەزيدەنت دونالد ترامپقا يمپيچمەنت جارييالاۋ تۋرالى رەزوليۋتسييانىڭ مەتٸنٸن جارييالادى. رەزوليۋتسييا بويىنشا, ترامپ "بٷلٸك ۇيىمداستىرماق بولدى", "اقش پەن ٷكٸمەت ينستيتۋتتارىنىڭ قاۋٸپسٸزدٸگٸنە قاتەر تٶندٸردٸ" دەپ ايىپتالدى.
6 قاڭتاردا ترامپتىڭ اشۋلى جاقتاستارى كاپيتولييگە باسىپ كٸرٸپ, وقيعادان بەس ادام قازا تاپقان.
دونالد ترامپتىڭ پرەزيدەنتتٸك مانداتى 20 قاڭتاردا اياقتالادى. وسى كٷنٸ جاڭا سايلانعان پرەزيدەنت دجو بايدەننٸڭ يناۋگۋراتسيياسى ٶتەدٸ.
13-14 قاڭتاردا رەزوليۋتسييا قۇجاتى تالقىلانىپ, كەيٸن ٶكٸلدەر پالاتاسى يمپيچمەنتكە داۋىس بەرۋٸ تيٸس. ٶكٸلدەر پالاتاسى يمپيچمەنتتٸ جاقتاپ داۋىس بەرسە, كەيٸن ونى سەنات قارايدى. ەگەر سەنات ترامپقا يمپيچمەنتتٸ قولداسا, ول پرەزيدەنت سايلاۋىنا تٷسە المايدى.
6 قاڭتاردا, كونگرەستٸڭ پرەزيدەنت سايلاۋىنىڭ داۋىس بەرۋ نەتيجەسٸن ماقۇلداۋ وتىرىسى الدىندا, ترامپ اق ٷي جانىندا ٶز جاقتاستارىنا قايىرىلىپ, "بٸز ەشقاشان بەرٸلمەيمٸز, ەشقاشان جەڭٸلمەيمٸز" دەگەن ەدٸ.
ترامپتىڭ وسى سٶزٸنەن كەيٸن ونىڭ اشۋلى جاقتاستارى 1,6 شاقىرىم جەردە ورنالاسقان كاپيتولييگە بارىپ, باسىپ كٸردٸ. ولار كونگرەستٸڭ سايلاۋ نەتيجەسٸن رەسٸمدەۋ پروتسەسٸنە كەدەرگٸ كەلتٸردٸ. ساياساتكەرلەر جيىن ٶتەتٸن زالدى تاستاپ كەتۋگە مەجبٷر بولدى. كونگرەسس جۇمىسىن ۆاشينگتوندا كومەندانتتىق ساعات ەنگەن سوڭ جالعاستىرىپ, كەيٸن بايدەننٸڭ جەڭٸسٸن ماقۇلدادى.
9 قاراشاداعى سايلاۋدا بايدەن سايلاۋشىلار القاسىنىڭ 306 داۋىسىن, دونالد ترامپ 270 داۋىسىن العان. كەيٸن ترامپ سايلاۋ نەتيجەسٸمەن كەلٸسپەيتٸنٸن ايتىپ, سوتقا شاعىم تٷسٸرگەن. سوت ونىڭ 50 ارىزىن قاناعاتتاندىرماي تاستادى.
