AQSh kongresiniń ókilder palatasy reseilik oppozitsiialyq saiasatker Aleksei Navalnyidyń ýlanýyna bailanysty rezoliýtsiia qabyldady. Zań shyǵarý organdary Vashingtondy "oppozitsionerge ý berý" oqiǵasyna bailanysty Reseige sanktsiia salýǵa shaqyrdy.
Kongress rezoliýtsiiasynyń rekomendatsiialyq sipaty bar.
18 qarashada Resei federaldyq qaýipsizdik qyzmeti (FSB) Navalnyiǵa "himiialyq qarý qoldaný oqiǵasy" boiynsha is qozǵaýdan bas tartqan. Is qozǵaý týraly ótinishti Navalnyi qurǵan Jemqorlyqpen kúres qory túsirgen. FSB oqiǵany ózge quqyq qorǵaý organynyń tekserip jatqanyn alǵa tartyp, is ashpaǵan.
Vedomstvonyń jaýabyna kóńili tolmaǵan Jemqorlyqpen kúres qorynyń zańgerleri FSB "jaltarma jaýap qaitardy" dep sanaidy. Olar FSB-nyń áreketsizdigine shaǵymdanyp, sotqa aryz túsirgen.
- 20 tamyzda Navalnyi Tomskiden Máskeýge qarai ushyp bara jatqan jolda jaǵdaiy kúrt nasharlap, esinen tanyp qalǵan. Bort tótenshe jaǵdaida Ombyǵa qonyp, saiasatker jergilikti aýrýhanaǵa jetkizilgen. Eki kúnnen keiin ony Berlindegi aýrýhanaǵa áketti. Saiasatker tek 19 kún ótkennen keiin ǵana esin jidy.
- Germaniia sarapshylary Navalnyidyń "Novichok" tobyna kiretin qaýipti zattan ýlanǵanyn aitty. Muny Eýropanyń ózge de táýelsiz zerthanalary da rastady. EO elderi Máskeýdi oqiǵany tergeýge shaqyrdy. Olar sonymen birge Navalnyiǵa shabýyl jasaýǵa qatysy bolýy múmkin Resei sheneýnikterine sanktsiia saldy.
- Navalnyi ózine arnaiy qyzmet Kreml nusqaýymen ý berdi dep sanaidy.
- Al Resei biligi oppozitsionerdiń ýlanýyna qatysy joǵyn aitady. Kremldiń baspasóz hatshysy Dmitrii Peskov jáne reseilik dárigerler Navalnyidyń aǵzasynan ý tabylmady dep málimdegen. Máskeý oqiǵany zertteý úshin Germaniiamen birigip, áreket etýge daiyn ekenin aitqan. Kreml Hmiliialyq qarýǵa tyiym salý jónindegi uiymdy "nemqurailyǵy" úshin de aiyptaǵan.
