AQSh memlekettik departamenti 25 aqpanda Nur-Sultandaǵy tergeý izoliatorynda jumbaq jaǵdaida kóz jumǵan belsendi Dýlat Aǵadildiń ólimine "qatty alańdap otyrǵanyn" málimdedi. Bul týraly Azattyq agenttigi habarlady.
"Biz [Aǵadildiń ólimi] tolyq ári muqiiat zertteledi dep oilaimyz jáne prezident Qasym-Jomart Toqaevtyń saiasi bostandyqty keńitý boiynsha bergen ýádesin tolyq júzege asyrýǵa shaqyramyz" dedi AQSh memlekettik hatshysynyń Ońtústik jáne Ortalyq Aziia isteri boiynsha kómekshisiniń orynbasary Elis Ýells Twitter-de.
AQSh memlekettik departamentiniń ókili Dýlat Aǵadildiń otbasy men týystaryna kóńil aitty.
Nur-Sultan politsiia departamentiniń aldyn ala deregi boiynsha, belsendi Aǵadil «júrek talmasynan» kóz jumǵan. Belsendiler men Aǵadildiń tanystary onyń júregi aýyrmaǵanyn aitady. Olar oqiǵaǵa syrtqy kúshterdiń qatysy bar deidi.
Dýlat Aǵadil 2019 jyly aqpanda el astanasynda ýaqytsha baspanada shyqqan órt saldarynan áleýmettik jaǵdaiy tómen otbasynyń kámeletke tolmaǵan bes balasy mert bolǵan soń, Qazaqstannyń ár aimaǵynda úkimetten áleýmettik qoldaýǵa muqtaj jandarǵa járdem jasaýdy talap etken narazylyqtar kóbeigen tusta belsendiligimen kózge túsken edi. Ol bilikten saiasi tutqyndardy bosatýdy, azaptaýdy toqtatýdy, azamattardyń beibit sherý ótkizý bostandyǵyn qamtamasyz etýdi jáne ádil sailaýdy talap etip, narazylyq aktsiialaryna qatysty.
El óńirlerin aralap, ózi qatysqan túrli narazylyq sharalarynan Facebook áleýmettik jelisi arqyly tikelei efir júrgizgen Dýlat Aǵadil "bolǵan jaitty burmalamai ári jedel jetkizetin belsendi bloger retinde de tanyldy" deidi jaqtastary.
Ol birneshe ret ákimshilik jazaǵa tartylyp, 2019 jyldyń tamyz aiynan beri 60 kún ákimshilik qamaýda bolǵan. Oǵan "politsiia qyzmetkerine baǵynbady", "sotqa qurmetsizdik kórsetti", "zańsyz mitingige qatysty" degen aiyptar taǵyldy. Ol taǵylǵan aiyptardy joqqa shyǵardy.
