AQSh "jaqyn kúnderi" Belarýs prezidenti Aleksandr Lýkashenkonyń mańaiyndaǵy adamdarǵa sanktsiia engizedi jáne budan basqa da sanktsiia sharalaryn qabyldaýy múmkin. Bul týraly 11 qyrkúiekte AQSh memlekettik hatshysynyń orynbasary Stiven Bigan málimdedi. Ol AQSh-tyń Lýkashenkony Belarýstiń "zańdy sailanǵan prezidenti emes" dep sanaitynyn rastady. Vashington Belarýste 9 tamyzda ótken prezident sailaýy erkin, ádil bolǵan joq deidi. Buǵan qosa AQSh Belarýs biliginiń narazylyq sherýine shyqqan beibit azamattar men oppozitsiia ókilderine kúsh qoldanýyn qatań aiyptaidy.
Bigan Belarýske naqty qandai sanktsiia salynatynyn ashyp aitpady, biraq AQSh ol týraly Eýropa odaǵyndaǵy áriptesterimen keńesip jatqanyn jetkizdi. Buǵan deiin Belarýske qarsy Eýropa odaǵy daiyndaǵan sanktsiia Kiprdiń ustanymyna bola kúshine engen joq. Kipr Jerorta teńizindegi qairańnyń daýly aýmaǵynda burǵylaý jumystaryn júrgizip jatqan jeti túrik kompaniiasyna shekteý qoimaiynsha, Eýroodaqtyń Minskige sanktsiia salý týraly ortaq sheshimin qoldaýdan bas tartqan.
AQSh buǵan deiin Lýkashenko men Belarýstiń ózge de joǵary laýazymdy sheneýnikteri – jiyntyǵy 17 adamǵa sanktsiia salǵan. Eýropa odaǵynyń sanktsiia tiziminde Lýkashenko joq.
Bigan AQSh-tyń Belarýste ádil, taza prezident sailaýy qaita ótýi tiis dep sanaitynyn taǵy da qaitalady. Buǵan qosa ol Reseidiń Lýkashenko rejimine qoldaý tanytýyn túsiný qiyn ekenin aitty.
"Eger Kreml mundai saiasatyn jalǵastyra beretin bolsa, onda Máskeý Reseige esh ókpesi joq belarýs halqynyń qarsylyǵyna tap bolýy múmkin", – dedi Bigan.
AQSh memlekettik hatshysynyń orynbasary Resei prezidenti Vladimir Pýtindi 14 qyrkúiekte Máskeýde Lýkashenkomen kezdesken kezde saiasi tutqyndardy bosatý, Belarýstegi narazylyq sherýine qatysýshylarǵa kúsh qoldanýdy doǵarý máselelerin qozǵaýǵa úndedi.
Lýkashenkony altynshy márte el prezidenti bolyp sailandy degen sailaýdyń resmi qorytyndysymen kelispegen halyq narazylyǵy 9 tamyzdan beri jalǵasyp jatqan Belarýstegi ahýal "Vyshegrad tórttigi" elderi basshylarynyń Liýblinde ótken kezdesýinde de talqylanǵan. Bul tórttikke Polsha, Chehiia, Slovakiia men Vengriia kiredi. Tórt eldiń basshylary Eýropa odaǵy sammitine, Polsha premer-ministri Mateýsh Moravetskii aitqandai, "belarýs halqyn qoldaý" sharalaryn usyný týraly uiǵarymǵa kelgen. Osy sharalardyń arasynda Belarýs azamattaryna Eýroodaq aýmaǵyna vizasyz kelýge ruqsat berý jaily usynys ta bar.
Chehiia premer-ministri Andrei Babish Belarýste jańa prezident sailaýy ótýi kerek dep málimdegen. Sonymen birge ol "tórttik" sammiti aiasynda Belarýs prezidenttigine burynǵy kandidat Svetlana Tihanovskaiamen kezdesý týraly Polshanyń usynysynan bas tartqan dep jazady poliak pen cheh basylymdary. Jaqtastary 9 tamyzda ótken sailaýda Tihanovskaia kóp daýys aldy dep sanaidy. Babish "asyǵys qadamǵa" barǵysy kelmeitinin aitqan. , Polsha premer-ministri Moravetskii 9 qyrkúiekte Varshavada Tihanovskaiamen kezdesken, al Litva parlamenti (seim) Tihanovskaiany "belarýs halqynyń sailanǵan jetekshisi" dep ataǵan.
