AQSh-tyń respýblikashyl jáne demokrat kongresmenderi Kreml Azat Eýropa/Azattyq radiosynyń Reseidegi qyzmetin shekteýdi, jýrnalisterin jazalaýdy kúsheitse, Máskeýge qarsy jańa sanktsiialar salýǵa shaqyrdy.
Kongresmender bul týraly AQSh prezidenti Djo Baiden men onyń ákimshiligine joldaǵan hatynda jazǵan. 22 qańtar kúngi bul hatta Ókilder palatasynyń músheleri sondai-aq Azattyq radiosynyń Belarýs qyzmetine qoldaý bildirýge de shaqyrǵan.
Azattyqtyń Belarýs qyzmeti ótken jyldyń tamyzynda bastalǵan narazylyq tolqýy kezinde táýelsiz basylym retindde belsendi jumys istep, biliktiń qarsylyǵy men kedergilerine tap boldy. 2020 jylǵy 9 tamyzda Belarýste prezident sailaýy ótip, Aleksandr Lýkashenko jeńimpaz jariialanǵan soń, daýys berý nátijesi burmalandy degen halyq kóshege shyqty. Halyq narazylyǵy birneshe aiǵa ulasty.
Resei buqaralyq aqparat quraldarynyń jumysyn retteitin Roskomnadzor mekemesi osy aida Azattyqtyń Orys qyzmetine júzdegen myń dollar aiyppul salatynyn málimdegen. Mekeme Azattyq qyzmetin Reseidiń "shetel agenti" týraly jańa zańynyń talaptaryn oryndamady dep aiyptap otyr.
Zańnyń kóptegen talaptarynyń biri – qarjysyn shetelden alatyn basylymdardyń "shetel agenti" degen belgimen habar taratýǵa mindettelýi. Bul zań Azattyqtyń Orys qyzmeti tilshilerine qylmystyq qýdalaý qaýpin tóndiredi.
AQSh Kongresi qarjylandyratyn Azat Eýropa/Azattyq radoisy úkimettik emes uiymy Resei biliginiń talabyn oryndamady. Kreml salǵan aýyr aiyppul Azattyq radiosynyń Reseidegi qyzmetiniń jabylýyna ákelýi múmkin.
"Eger Máskeý osy áreketterin budan ári jalǵastyrsa, biz sizdiń ákimshiligińizben birlese jumys istep" Reseidi jazalaý úshin qolda bar zańdardy paidalanýǵa "daiynbyz" delingen hatta. Hatqa Ókilder palatasynyń ókili Greg Miks pen múshesi Maikl Makkol qol qoiǵan. Biri demokrat, biri respýblikashyl bul ekeýi Ókilder palatasy Syrtqy ister jónindegi komitetiniń beldi músheleri. Hatqa bulardan bólek úsh kongresmen qol qoiǵan.
AQSh zań shyǵarýshylary qolda bar zańdar dep Magnitskii zańyn, Ǵalamdyq Magnitskii zańyn jáne Amerika qarsylastaryna sanktsiia arqyly tótep berý týraly zańdy meńzep otyr. Bul zańdar keiingi toǵyz jylda Resei sheneýnikterine qarsy jii qoldanyldy. Sanktsiia tizimine ilingenderdiń AQSh-taǵy múlki buǵattalyp, olarǵa AQSh-qa kelýge viza berilmeidi.
Baiden ákimshiligi AQSh-tyń Reseimen qarym-qatynasy burynǵydan ózgeshe sipatta bolatynyn bildirdi. Ákimshilik Kreml synshysy Aleksei Navalnyiǵa qoldaý bildirip, qarý-jaraq óndirisin shekteý jónindegi kelisimderdi keńeitýge bekinip otyr.
