Siriianyń soltústigindegi AQSh áskerileri. Sáýir, 2018 jyl.
AQSh áskeri Resei tarapynan tóngen qaterge bailanysty Siriianyń ońtústiginde shuǵyl jattyǵýlar bastady. Bul týraly amerikalyq áskeri sheneýniktiń sózine silteme jasap CNN habarlaidy. Onyń málimetinshe, bul jattyǵýlar Reseidiń Siriiadaǵy amerikalyq áskeriler ornalasqan bolýy yqtimal aýdandarǵa soqqy beretini týraly AQSh-qa bir aptanyń ishinde eki ret jasaǵan eskertýine tikelei jaýap bolyp otyr.
Jattyǵýlar AQSh-tyń Siriiadaǵy múmkindikterin Máskeýge kórsetý maqsatyn kózdeidi dep málimdeidi koalitsiianyń ortalyq basshylyǵynyń bas ókili kapitan Ýiliam Ýrban.
AQSh áskeri tez is-qimyl jasap, qurlyqtaǵy jáne áýe kúshteriniń birlesip soqqy berýin, sonymen birge jaý pozitsiiasyn shapshań basyp alý qabiletin arttyrýǵa mashyqtanady. Operatsiiaǵa áýeden soqqy beretiin tikushaqtar da qatystyrylady. Jattyǵýlar Homs provintsiiasyndaǵy amerikalyq baza ornalasqan Et-Tanf mańynda ótip jatyr.
Komandir Shon Robertson AQSh-tyń Máskeýmen kikiljiń izdemeitindigin, biraq amerikalyq ásker men odaqtastaryn esh irkilissiz qorǵaýǵa burynǵysynsha daiyn ekenin jetkizgen. Telearna aty-jóni atalmaǵan amerikalyq sheneýnikke silteme jasap, AQSh tarabynyń reseilikterge Pentagonnyń "jaýap berýge» ázir ekenin aityp, "Et-Tanftan aýlaq bolýǵa» keńes bergeni týraly habarlaǵan.
Habarlarǵa qaraǵanda, Reseidiń amerikalyq áskeriler shoǵyrlanǵan jerlerge qanatty zymyrandarmen soqqy berýi múmkin ekeni jaily juma kúni jasaǵan málimdemesi Pentagonnyń erekshe alańdaýshylyǵyn týǵyzǵan. Máskeý ol aýmaqtarda qarýly islamshyldar bar dep sanaidy.
