AQSh biligi Qazaqstan, Tájikstan jáne Ózbekstannan Aýǵanstanda amerikalyq áskerilerge kómektesken aýǵandardy ýaqytsha ornalastyrýdy suraǵan. Bul týraly derekkózderine silteme jasaǵan Bloomberg saity jazdy, dep habarlaidy Azattyq radiosy.
Vashington AQSh áskerin Aýǵanstannan shyǵarǵan soń Taliban amerikalyq áskerilerge qol ushyn bergen aýǵandardy jazalaidy dep qaýiptenedi.
AQSh-tyń bul usynysy jaily resmi habarlanǵan joq, biraq AQSh memlekettik hatshysy Entoni Blinken 1 shildede Vashintonda Ózbekstan syrtqy ister ministri Abdýlaziz Kamilovpen jáne Tájikstan syrtqy ister ministri Sirodjiddin Mýhriddinmen kezdesken.
Blinken Kamilovpen kezdesýde "Aýǵanstanda beibitshilik ornatý jumysyna kómekteskeni úshin Ózbekstanǵa alǵys aitqan".
AQSh Aýǵanstandaǵy áskerilerin 11 qyrkúiekke deiin tolyq áketpek. Keiingi kezde bul elde bilik áskerileri men tálipter arasynda qaqtyǵys bolyp jatyr. BUU esebinshe, keiingi aida "Taliban" Aýǵanstan aýmaǵynyń 70 paiyzyna baqylaý ornatqan.
AQSh áskerilerine kómektesken aýǵandyqtar (kólik júrgizýshileri, qurylysshylar, aýdarmashylar, basqa da mamandar) qazir qaýipsizdigine alańdaidy. AQSh biliginiń esebinshe, qazir Aýǵanstanda tálipterdiń qaýpi tónip turǵan 9000 myń adam (otbasylarymen qosa alǵanda) bar.
Buǵan deiin AQSh Iraktaǵy soǵysta kómektesken jergilikti turǵyndarǵa saiasi baspana men grin-karta bergen. Biraq keiingi kezde Kongress arnaiy immigratsiia vizasynyń sanyn shektegendikten aýǵandarǵa kóshirip alý jaǵy qiyn bolyp tur.
Blinken Kongresten arnaiy immigratsiia vizasyna qoiylǵan shekteýdi ósirip, 8 myń aýǵanǵa viza berýdi suraǵanyn aitty. Biraq bul másele áli sheshilgen joq. Bloomberg saitynyń jazýynsha, qazir AQSh basqa elderden aýǵandardy ýaqytsha ornalastyrý jaǵynan kómek surap jatyr.
AQSh memlekettik departamentiniń ókili Ned Prais "Aýǵanstandaǵy áskerimizdi tolyq áketkenge deiin aýǵandar men olardyń otbasy da basqa elge shyǵyp úlgeredi" degen.
Keibir resmi ókilder aýǵandardy Tynyń muhityndaǵy Gýam aralyna ýaqytsha ornalastyrýdy da usynǵan. Bloomberg "AQSh Gýam ideiasyna asa kóńil bólip otyrǵan joq" dep jazady.
"Viza kútip otyrǵan aýǵandardy [Tájikstan, Ózbekstan jáne Qazaqstanǵa ýaqytsha ornalastyrý] jańalyǵy tań qaldyrdy. Bizdi erterek Aýǵanstannan alyp ketedi dep úmittenemiz, sebebi munda jaǵdai qiyndap barady. Bul elder Aýǵanstannan qaraǵanda áldeqaida qaýipsiz" dedi AQSh qarjylandyratyn jobanyń aýǵan qyzmetkeri Amin Rahimi.
