Qazaqstan men AQSh joǵarǵy deńgeidegi strategiialyq seriktestikti keńeitýge nietti. Bul týraly QR Syrtqy ister ministriniń birinshi orynbasary Aqan Rahmetýllin aitty, dep habarlaidy QazAqparat.
«Búgin AQSh Memlekettik hatshysynyń azamattyq qaýipsizdik, demokratiia jáne adam quqyqtary jónindegi orynbasary Ýzra Zeianyń sapary aiasynda QR Prezidenti Ákimshiligi basshysynyń orynbasary – QR Prezidentiniń Halyqaralyq yntymaqtastyq jónindegi arnaiy ókili Erjan Qazyhannyń teń tóraǵalyǵymen Qazaqstan men AQSh arasyndaǵy adam quqyqtary men demokratiialyq reformalar jónindegi joǵary deńgeidegi dialogtyń birinshi otyrysy ótti. Bul tetik ekijaqty qarym-qatynasqa qosymsha serpin beredi jáne Qazaqstannyń demkoratiialyq kún tártibin ilgeriletýge baǵyttalǵan», - dedi ol.
Onyń atap ótýinshe, shara barysynda taraptar BUU-nyń Adam quqyqtary jónindegi keńesindegi yntymaqtastyq, dini senim bostandyǵy, Qazaqstandaǵy saiasi reformalar, halyqtyń áljýaz tobynyń quqyǵyn qorǵaý jáne yqpaldastyrý, adam saýdasyna qarsy is-qimyl máseleleri talqylanǵan.
Sonymen qatar áielderdiń, múmkindigi shekteýli adamdardyń quqyqtary men múmkinshilikterin keńeitý, qaýipsizdik, quqyq qorǵaý salalaryndaǵy yntymaqtastyq, jemqorlyqpen kúres máseleleri qozǵaldy.
«Prezident Qasym-Jomart Toqaev bastamashylyq jasaǵan eldi odan ary demokratiialandyrýǵa, adam quqyqtarynyń saqtalýyn qamtamasyz etýge baǵyttalǵan saiasi reformalarǵa basa mán berildi. Amerikalyq tarap Memleket basshysynyń saiasi jáne áleýmettik-ekonomikalyq salalardaǵy, memlekettik institýttardaǵy saiasatyn odan ary júzege asyrýǵa qoldaý bildirdi. Qazaqstan men AQSh syndarly yntymaqtastyqty odan ary qoldaýǵa jáne joǵary ári joǵarǵy deńgeidegi strategiialyq seriktestikti keńeitýge nietti», - dedi Aqan Rahmetýllin.
