Abaidyń 175 jyldyq mereitoiyna orai elordada 300-den astam shara ótedi. Bul týraly búgin elorda ákimdiginde ótken keńeitilgen keńeste Nur-Sultan qalalyq tilderdi damytý jáne arhiv isi basqarmasynyń bastyǵy Tileýǵali Qyshqashbaev aitty, dep habarlaidy QazAqparat.
«Uly Abaidyń 175 jyldyǵy biyl atalyp ótetin eń mańyzdy mereitoilardyń biri. Qazirgi ýaqytta qalalyq is-sharalar jospary jáne onyń tujyrymdamasy bekitilgen. Is-sharalardy uiymdastyrý jumystary bastalyp ta ketti. Ótken jyldyń tamyz aiynda Tilderdi damytý jáne arhiv isi basqarmasy «Uly Abaidyń izimen« degen ataýmen ǵylymi-tanymdyq sapar uiymdastyryp, ziialy qaýym ókilderinen quralǵan top Abai eline saiahat jasap qaitty. Sonymen qatar Bilim basqarmasyna qarasty jasóspirimderdiń ólkentaný uiymdarynyń uiymdastyrýymen mektep oqýshylaryna arnalǵan ekskýrsiialyq týrdyń 1-kezeńinde Abai eline elordalyq oqýshylar bardy. Ekinshi kezeń aldaǵy ýaqytta, jazǵy demalys kezinde jalǵasady. Sonymen qatar qyrkúiek aiynan bastap ashyq sabaqtar, tárbie saǵattary, poeziia keshteri uiymdastyrylýda. Bul sharalar aldaǵy ýaqytta da jalǵasyn tabady», - dedi ol.
Onyń atap ótýinshe, 2020 jyly bekitilgen qalalyq josparǵa sáikes, elrodamyzda ártúrli deńgeide 300-dei shara ótedi. Mektepke deiingi mekemelerden bastap mektepterde, orta arnaýly oqý oryndarynda jáne joǵary oqý oryndarynda, mekemelerde, teatrlarda Abai oqýlary, poeziia keshteri, kitap kórmeleri, Abai joly qoiylymdary, tarihi tanymdyq saiahattar, jas aqyndar poeziialyq keshteri, Abai ánderi keshi, aqyndar aitysy, tárbie saǵattary jáne úkimettik emes uiymdarmen birlesken is-sharalar uiymdastyrylady. Sonymen qatar qalanyń iri saýda oryndarynda, saiabaqtarǵa, aialdamalarda jáne adamdar kóp shoǵyrlanatyn oryndarda Abaidyń qara sózderi men óleńderi aýdio formatta taratylyp, qalanyń kórikti jerlerindegi taqtaishalarǵa uly tulǵalardyń Abai týraly aitqan qanatty sózderi ornalastyrylady.
«Abaidyń mereitoiyna orai ótetin sharalardyń mańyzdysy - qazan aiyna josparlanyp, respýblikalyq josparǵa engen «Abai jáne rýhani jańǵyrý máseleleri« atty halyqaralyq ǵylymi-tájiribelik konferentsiia. Bul sharaǵa elimizden bólek Abaitaný salasyna eńbek sińirgen ǵalymdar, onyń ishinde Germaniianyń Gete institýtynan, Túrkiiadan, Mońǵoliiadan, Qytaidan, Amerikadan jáne Kanadadan, Tatarstan men Ázerbaijan syndy ózge de memleketterden Abaidyń shyǵarmashylyǵy men ómir jolyn zerttep júrgen ziialylar qatysady dep josparlanǵan», - Tileýǵali Qyshqashbaev.
