AQSh memlekettik departamenti Ýkrainada sovet biligi kezinde milliondaǵan adamdy qurban etken asharshylyqtyń (Golodomor) 85 jyldyǵyna arnap málimdeme taratty, dep habarlaidy Azattyq.
"Iosif Stalinniń rejimi olardy ádeii ashtan qatyrdy", - delingen 23 qarashada jariialanǵan qujatta. "Ýkrainada jer men astyqty jabaiylyqpen tartyp alý belgili bir saiasi maqsat – ýkrain halqy men eldi baǵyndyrý úshin júrgizildi", - dep jazǵan memlekettik departament. Bul qujatta Golodomordy "20-ǵasyrdaǵy eń joiqyn aiýandyqtardyń biri" dep ataǵan.
1932-1933 jyldary bolǵan Golodomor kezinde sovet biligi jeke sharýalardyń astyǵy men basqa da azyq-túligin tartyp alý arqyly olardy ujymdyq sharýashylyqqa (kolhoz) kirýge májbúrledi. Tarihshylardyń pikirinshe, esepsiz adam qyrǵynǵa ushyraǵan Golodomorǵa osyndai is-áreketter negizgi sebep bolǵan.
Ýkrainalyqtardyń kóbi osynaý qaiǵyly oqiǵany "genotsid" dep baǵalaidy. Túrli esepter boiynsha, Golodomordan 3 millionnan 7 millionǵa deiin adam qurban bolǵan delinedi. Ýkrainamen birge taǵy 15 el Golodomordy "genotsid" dep tanyǵan.
Máskeý "Golodomor tusyndaǵy saiasat júieli sipatta bolǵan" degendi uzaq jyldardan beri joqqa shyǵaryp, oqiǵaǵa "astyqtyń azdyǵy sebep bolǵan" deidi.
AQSh memlekettik departamenti 23 qarashada jariialaǵan málimdemede buǵan qosa "ýkraindar búginde Reseidiń Ýkrain halqynyń biregeiligi men batysshyl kóńil-kúiin joiý áreketiniń kesirinen taǵy da qyrǵynǵa tap boldy" delingen.
Ýkraina Golodomor qurbandaryn jyl saiyn qarashanyń tórtinshi senbisinde eske alady.
1932-1933 jyldary bolǵan asharshylyq zulmatynan qazaq halqy da qatty zardap shekti. Kei málimetter boiynsha, ashtyq kesirinen bir millionnan 1,75 millionǵa deiin adam qyrylǵan. Kóp adam Sovet odaǵynyń ózge aimaqtaryna, Qytai, Mońǵoliia, Iran men Aýǵanstanǵa kóshýge májbúr bolǵan. Qazaqstanda asharshylyq pen saiasi qýǵyn-súrgin qurbandaryn jyl saiyn mamyrdyń 31-i kúni eske alady.
