Qurama Shtattar prezidenti Donald Tramp Dúniejúzilik densaýlyq saqtaý uiymy (DDU) koronavirýs pandemiiasymen kúreste dármensiz bolýyna bailanysty uiymnyń biýdjetine jarna tóleýdi toqtata turýǵa buiryq bergenin málimdedi. Bul týraly "Ult aqparat" VVS agenttigine silteme jasap habarlaidy.
«Shynaiy jaǵdai bylai, Dúniejúzilik densaýlyq saqtaý uiymy aqparatty jetkilikti dárejede alyp otyrmady, teksermedi jáne ony ýaqytyly jáne ashyq túrde jariialamady.
Álem elderi Dúniejúzilik densaýlyq saqtaý uiymy densaýlyqqa tónetin halyqaralyq qaýip týraly naqty aqparattardy ýaqytyly taratyp otyratynyna úmittenedi. Al eger olai bolmasa oryn alyp jatqan jaǵdai týraly óz betimen jetkizedi. DDU atalǵan negizgi mindetin oryndamady jáne jaýapkershilikke tartylýy kerek. Ondaǵan jyldardan keiin ýaqyt jetti», - dedi Tramp Aq úidegi baspasóz máslihatynda.
Prezidenttiń aitýynsha, BUU agenttigi qytailyq jalǵan aqparatty taratqan. Bul epidemiianyń anaǵurlym aýqymdy saldaryna alyp kelgen.
Osylaisha, D. Tramp Qytaida paida bolǵan virýstyń ǵalamshar boiynsha taralyp ketý oqiǵasynda DDU-nyń róli anyqtalǵanǵa deiin qarjylandyrýdy toqtata turýǵa nusqaý berdi.
Aita keteiik, AQSh – DDU-nyń eń iri qarjylandyrý kózi. Tek ótken jyldyń ózinde ǵana olardyń jarnasy 400 mln dollardy, iaǵni uiym biýdjetiniń 15% quraǵan bolatyn.
Al BUU Bas hatshysy Antonio Gýterresh qazir Dúniejúzilik densaýlyq saqtaý uiymynyń nemese virýspen kúresetin basqa da gýmanitarlyq uiymdardyń qyzmeti úshin resýrstardy qysqartatyn ýaqyt emes ekenin málimdedi.
«Qazir – bul virýsty jáne onyń epidemiialyq saldaryn joiý úshin halyqaralyq qaýymdastyqtyń birlesip jumys jasaityn ýaqyty», - dedi BUU Bas hatshysy.
