AQSh-tyń Aliaska shtatynda biýlletenderdiń basym bóligi sanalǵannan keiin ol jaqta qazirgi Aq úi jetekshisi Donald Tramptyń alǵa shyqqany habarlandy.
Amerikada prezident sailaýy ótkennen keiin 8 kúnnen soń amerikalyq BAQ osyndai qorytyndy jasady. Tramptyń Aliaskada jeńetinin sarapshylar osyǵan deiin de boljaǵan. Amerikadaǵy eń iri ári halyq tyǵyzdyǵy az shtattaǵy jeńisin qosqanda Tramp sailaýshylar alqasynyń 217 daýysyna ie bolady. Biraq qarsylasy, demokrat Djo Baidennen báribir aitarlyqtai artta keledi. Qazir Baidende 279 daýys bar. Ol prezident retinde sailaný úshin qajet mejeden (270 daýys) óte alǵan.
Barak Obama ákimshiligi tusynda vitse-prezident bolǵan Baiden Arizona men Djordjiia shtattarynda da alda keledi. Ol jaqta daýys sanaý tolyq aiaqtalǵan joq. Djordjiia 14 myń daýys aiyrmashylyǵy úshin barlyq biýlletenderdi qaitadan qolmen sanap shyǵýǵa daiyndalyp jatyr. Daýys sanaý tolyq bitpegen Soltústik Karolinada Tramp alda keledi.
Kongress sailaýynyń nátijesi boiynsha, Aliaskada senator Den Sallivan jeńiske jetip, sonyń arqasynda respýblikashyldar senattaǵy 100 orynnyń jartysyn ielengen. Qazir demokrattar senattaǵy 48 orynǵa ie, biraq qalǵan eki orynǵa kimder otyratyny belgisiz, sebebi Djordjiia shtatynda kandidattardyń eshqaisysy 50 paiyzdan artyq daýys jinai almaǵan. Onda qańtar aiynda sailaýdyń ekinshi týry ótedi.
Prezident sailaýynyń resmi qorytyndysy áli shyqpaǵanmen Amerika aqparat quraldary Baiden jeńiske jetti dep boljaǵan. Kóptegen álem basshylary Baidendi quttyqtap ta úlgerdi.
Tramp sailaýda jeńilgenin moiyndaýdan bas tartty. Onyń sailaý shtaby jáne birqatar respýblikashyldar sailaý nátijesi aýytqyp turǵan shtattarda sotqa aryz túsirgen. Biraq sottardyń basym bóligi aryzdaryn keri qaitarǵan. Olardyń aitýynsha, shtab ókilderinde daýys urlanǵany nemese sailaý nátijesiniń burmalanǵany jaily aiǵaq joq.
Al Djo Baiden jáne onyń komandasy federaldyq úkimetti baqylaýǵa alý daiyndyǵyna kóship ketti.
