Resei prezidenti Vladimir Pýtin AQSh-taǵy prezident sailaýyna yqpal etý talpynysynan habardar boldy. Reuters agenttiginiń Amerika barlaý qyzmetindegi qupiia derekkóziniń aitýynsha, bul talpynystyń ar jaǵynda Pýtinniń ózi turǵan bolýy múmkin. Máskeý jalǵan aqparat taratyp, Djo Baiden jaqtastaryn adastyrǵysy keldi, deidi barlaý qyzmetiniń ókilderi.
Reseidiń 2020 jyly AQSh-taǵy sailaý kampaniiasyna aralasqany jaily tujyrymdar 16 naýryzda jaryq kórgen AQSh ulttyq barlaý qyzmeti jariialaǵan 15 bettik baiandamada aitylady. Qujatta Tramptyń odaqtastary Máskeý múddesine sai áreket etip, reseishil qyzmetkerlerdiń Baidendi synaýyna atsalysqany jazylǵan.
Soǵan qaramastan prezident sailaýynda demokrat Djo Baiden respýblikashyl Donald Trampty jeńip, 20 qańtarda prezident qyzmetine kiristi.
AQSh barlaý qyzmeti Reseiden bólek, ózge de birqatar elderdiń sailaý qorytyndysyna yqpal etpek bolǵanyn anyqtaǵan. Atap aitqanda, Iran Tramp jaqtastarynyń senimsizdigin arttyrýǵa tyrysqan. Tegeran AQSh-ty Iranmen jasalǵan iadrolyq kelisimnen shyǵaryp, Iranǵa jańa sanktsiia salǵany úshin Tramptan ese qaitarmaqshy bolǵan.
Baiandama avtorlary Qytai sailaý kampaniiasynda Baidendi jaqtap, sonyń jeńýine yqpal etýge tyrysty degen Tramp jaqtastarynyń tujyrymyna da reaktsiia bildirgen. Barlaý qyzmetiniń sarapshylary Pekinde Amerikadaǵy sailaýǵa aralasý nieti bolǵan joq dep sanaidy.
"Qytai AQSh-pen qarym-qatynasynyń turaqty bolǵanyn qalaidy jáne nátijesi qandai bolmasyn, ony óziniń múddesi úshin táýekel etý múmkindigi dep qarastyrǵan joq" deidi baiandama avtorlary.
Amerika barlaý qyzmetiniń sarapshylary sonymen birge Kýba, Venesýela jáne livandyq radikal top "Hezbollanyń" sailaýǵa aralasýǵa tyrysqanyn da atap ótedi. Alaida olardyń múmkindikteri Resei men Iranmen salystyrýǵa kelmeidi dep sanaidy.
