Jeksenbi, 22 qarashada AQSh "Ashyq aspan" jaily kelisimnen shyqqanyn resmi málimdedi. Bul jaily habarlama memlekettik departament saitynda jariialandy.
Alty ai buryn, 21 mamyrda AQSh 28 jyl buryn jasalǵan, biraq 2002 jyly kúshine engen kelisimnen shyǵatynyn málimdegen. Bul kelisim boiynsha, ár memleket óz aýmaǵynyń ústinen áýe keńistigi arqyly baqylaýǵa ruqsat beredi.
AQSh kelisimnen shyǵýynyń sebebin Reseidiń qujat sharttaryn saqtamaýymen bailanystyrady. Osyǵan deiin AQSh memlekettik departamenti Reseidiń Abhaziia jáne Ońtústik Osetiiamen (Resei olardy táýelsiz memleketter dep atasa, AQSh pen kóptegen elder Grýziianyń aýmaǵy dep sanaidy) shekarasy mańynda áýe keńistigin baqylaýǵa ruqsat bermegenin aitqan. Buǵan qosa, Ýkrainanyń aýmaǵy sanalatyn Qyrymda ushaqtarǵa arnalǵan janar-jaǵar mai stantsiiasyn ornalastyrǵanyn habarlaǵan.
AQSh mundai jospary baryn osydan bir jyl buryn málimdegen edi: Vashington Reseidi Kaliningrad oblysyna, Grýziia shekarasyna jáne iri áskeri jattyǵý aimaqtaryna ushýǵa tyiym saldy dep aiyptady.
Osylaisha Resei shartty buzǵanymen qoimai, AQSh-tyń infraqurylymy jaily aqparat jinaý úshin ony teris mánde paidalandy degen bolatyn.
Donald Tramptyń ulttyq qaýipsizdik boiynsha keńesshisi Robert O'Braien AQSh qarsylastarǵa ulttyq qaýipsizdikti paidalanyp, utýǵa múmkindik berip otyrǵan "eskirgen" kelisimnen shyǵady dep málimdegen.
Al Resei SIM AQSh sheshimin synaǵan. Máskeý "jaýap beretinin" aitqan.
Sheshimdi Vashingtonnyń NATO boiynsha birqatar odaqtastary mysaly, Germaniia qoldamai otyr. AQSh-tyń ózinde birqatar sarapshylar men saiasatkerler Resei kelisimdi buzsa da, AQSh odan shyqpaýy tiis dep esepteidi. AQSh-taǵy prezident sailaýynyń jeńimpazy atanǵan Djo Baiden de kelisimnen shyǵýǵa qarsy bolǵan.
Biyl AQSh pen Resei orta jáne qysqa qashyqtyqta ushatyn zymyrandar týraly kelisimshartty toqtatqan. Strategiialyq shabýyldaýshy qarýlar (SNV-1) týraly 2021 jylǵa deiin kúshi bar kelisim máselesinde de belgisizdik baiqalǵan. Baiden bul kelisimniń merzimin uzartýdy qoldaǵan.
Aita keteiik, shartqa 1992 jyly qol qoiyldy. Shart boiynsha múshe-elder bir-biriniń aýmaǵyn barlaýǵa, áskerleriniń ornalasqan jerin jáne qozǵalysyn baqylai alady.
Osy arqyly áskerdiń qarýlanýyna qoiylatyn shekteýlerdiń oryndalýy baqylanady. Osyndai barlaýdyń nátijesinde alynǵan aqparat kelisimniń barlyq qatysýshysyna qoljetimdi.
Osyǵan bailanysty birneshe kún buryn Resei SIM Shartta qalǵan elder Vashingtonmen derekterdi bólisýdi toqtatady jáne Eýropa elderindegi amerikalyq áskeri bazalar sharttan tys qalmaidy dep málimdegen bolatyn.
