Búgin Aqparat jáne qoǵamdyq damý vitse-ministri Marat Ázilhanov Qazaqstan musylmandary dini basqarmasynyń (QMDB) tóraǵasy, Bas múfti Naýryzbai qajy Taǵanulymen kezdesti, dep habarlaidy "Ult aqparat".
Ministrlikten málim etkendei, kezdesýde karantin talaptary jeńildetilgen kezde dini ǵimarattardyń jumys isteý máselesi talqylandy. Bas múfti meshitter ashylǵan jaǵdaida dini ǵimarattaǵy qyzmet sanitarlyq normalardy saqtai otyryp júrgiziletinin málimdedi. Óz kezeginde vitse-ministr QMDB-nyń meshitterde koronavirýs indetiniń taralýynyń aldyn alý boiynsha biryńǵai is-qimyl tártibin ázirleýdiń oryndylyǵyn jetkizdi.
M.Ázilhanov memleket pen dini birlestikterdiń, ásirese pandemiia siiaqty jahandyq syn-qaterler jaǵdaiynda odan ári yntymaqtastyǵy qajettigin atap ótti. Vitse-ministr QMDB tóraǵasyna dindar azamattardyń májbúrli karantindik sharalarǵa túsinistikpen qaraǵany jáne olardyń arasynda sanitarlyq-epidemiologiialyq normalardy saqtaýdyń mańyzdylyǵyn túsindirýde memleketke kómekteskeni úshin alǵys aitty.
Óz tarapynan Bas múfti biylǵy 31 shilde men 2 tamyz aralyǵynda ótken Qurban ait merekesi kezinde ministrliktiń kórsetken qoldaýyna alǵys bildirdi.
«Ministrliktiń kómegimen Dini basqarmanyń «Qurban2020.muftyat.kz» arnaiy saity iske qosyldy, sonyń arqasynda azamattar qashyqtan qaiyrymdylyq jasai alǵanyn nazarǵa salamyz. Jalpy, Qazaqstan boiynsha mereke kezinde 80 myńnan astam muqtaj adam qurbandyq etin aldy.
Sondai-aq, taraptar destrýktivti dini aǵymdardyń yqpalyna túsken azamattar arasynda túsindirý jumystaryn júrgizý máselelerin talqylady», - delingen vedomstvo aqparatynda.
