Aqpanda deklaratsiiada kórsetilmegen 995 410 dollar qolma-qol aqshany Qazaqstannan alyp shyqpaq bolǵandar anyqtaldy. Bul týraly QR Qarjy ministrliginiń Memlekettik kirister komiteti habarlady, dep jazady Tengrinews.kz agenttigi.
2022 jyldyń tek aqpanynda "Jetisý", "Áýejai-Astana", "Áýejai-Aqtóbe", "Qazyǵurt", "Áýejai-Shymkent", "Áýejai-Aktaý" keden beketterinde deklaratsiialanbaǵan qolma-qol aqsha qarajattaryn shyǵarýdyń 51 deregi anyqtalǵan. Deklaratsiialanbaǵan qolma-qol aqsha qarajattarynyń somasy - 995 410 dollar.
Vedomstvo málimetinshe, 2022 jylǵy aqpanda QR ÁQBtK-niń 551-baby 3-bóligi ("Taýarlardy, qolma-qol aqsha qarajatyn, aqsha quraldaryn deklaratsiialamaý nemese anyq emes kedendik deklaratsiialaý, kedendik qujattarda málimetterdi anyq emes málimdeý") boiynsha 50 ákimshilik material jasalǵan, osy zańbuzýshylyqtar boiynsha aiyppul somasy - 1 531 500 teńge.
Almatyda 2022 jylǵy aqpanda jeke tulǵalarǵa 37 ákimshilik quqyq buzýshylyq týraly materialdar jasalǵan jáne qylmystyq quqyq buzý sipatyndaǵy 1 derek anyqtalǵan. Kúdiktiler 298 million teńgeden asa, naqty aitqanda 688 262 AQSh dollaryn deklaratsiialamastan alyp ótpek bolǵan, aiyppuly - 1 133 310 teńge.
4 aqpanda Almaty qalasynyń halyqaralyq áýejaiynda "Jetisý" keden beketiniń qyzmetkerleri "Almaty-Ystambul" áýe reisimen ushýǵa baǵyttalǵan QR azamatyn toqtatqan. Ustaý kezinde 97 000 dollar somasynda deklaratsiialanbaǵan aqsha qarajaty anyqtalǵan. Material odan ary tergeý úshin Almaty qalasy boiynsha Ekonomikalyq tergeý departamentine berildi.
Al 11 aqpanda elorda áýejaiynda 32 myń dollardy zańsyz áketpek bolǵan azamat toqtatyldy, 22 aqpanda er adam 43 myń dollar aqshany alyp Dýbaiǵa ushpaq bolǵan. Aqtaý jáne Shymkent áýejailarynda birneshe jaǵdai anyqtalǵan.
Memlekettik kirister komiteti "Qazaqstan Respýblikasyndaǵy kedendik retteý týraly" Qazaqstan Respýblikasy kodeksiniń 343-baby 1-tarmaǵynyń 7-tarmaqshasynda qolma-qol aqsha qarajaty kedendik deklaratsiialaýǵa jatatynyn eske saldy.
