Aqmola oblysynyń diqandary dándi, burshaq jáne maily daqyldardy sebý jumystaryna kiristi. Naýqanǵa 31,6 myń aýyl sharýashylyǵy tehnikasy jumyldyrylady, dep habarlaidy "Ult aqparat" oblystyq ishki saiasat basqarmasyna silteme jasap.
Aýyl sharýashylyǵy daqyldarynyń ishinde jazdyq bidaidyń úlesi zor. Búingi tańda 530 myń tonna tuqymy bar. Elitalyq tuqymnyń egis kólemi 23,3 paiyzǵa ulǵaitylyp, 365 myń gektardy qurap otyr.
Fermerlerge «Keń dala» baǵdarlamasy boiynsha 5 paiyzdyq jeńildikpen nesie túrinde memlekettik qoldaý kórsetilýde. Diqandar memleket tarapynan bólingen 24 milliard teńge qarjyǵa qol jetkize alatyn bolady.
«Biylǵy jyly 15 myń gektar alqapqa tuqym sebý josparlanǵan. Onyń 10 myń gektaryna bidaidyń jumsaq tuqymy, 4 myń gektaryna arpa jáne 1 myń gektaryna zyǵyr sebiledi. Biz memlekettik baǵdarlama arqyly kómek alyp, onyń 50 paiyzyn igerdik. Bul qarjyǵa gerbitsid, janar-jaǵar mai satyp aldyq. Egis jumystaryn mamyr aiynyń 25-ne deiin aiaqtaý josparlanǵan», - deidi Qorǵaljyn aýdanyndaǵy «Miras-2000» JShS direktory Dálel Júzbaev.
Aita keteiik, biyl oblys boiynsha 4,9 million gektar alqapqa dán sebý josparlanǵan. Onyń 4,4 million gektary dándi burshaq, 254 myń gektary maily daqyldar, 181 myń gektary mal azyǵy, 16,1 myń gektary kartop jáne 3 myń gektary kókónis daqyldary.
