Aqmola oblysynda órt kezinde úsh adam qaza tapty, dep habarlaidy QazAqparat.
Búgin, 1 naýryzda Bulandy aýdanynyń Kýpchanovka aýylynda 81 sharshy metr jeke turǵyn úide órt shyqty.
Órt sóndirý bólimshesi kelgen ýaqytta úi tolyǵymen otqa oranǵan.
Oqiǵa ornynan 1976 jáne 1987 jyly týǵan eki áiel men 1994 jyly týǵan er adamnyń máiiti tabyldy.
Bir adam terezeni syndyryp shyǵyp aman qalǵan jáne órt sóndirýshilerdi shaqyrǵan.
«Aldyn ala aqparat boiynsha, úi iesi 1976 jyly týǵan áiel otbasylyq merekede, dostarynyń arasynda ulynyń kámeletke tolǵanyn atap ótpek bolǵan. Keiin órt kezinde kelgen qonaqtar úi iesimen birge qaza tapqan», – dedi Aqmola oblysy TJD memlekettik-órt baqylaý basqarmasynyń bastyǵy Dýman Daleshov.
Órt 03.10 kezinde aýyzdyqtalyp, 04.55-te tolyq sóndirildi.
Tilsiz jaýdyń sebebi anyqtalyp jatyr. Sot-meditsinalyq saraptama taǵaiyndaldy.
Oqiǵa ornyna TJD 11 qyzmetkeri men 3 tehnika shyqty.
Aqmola oblysynyń tótenshe jaǵdailar departamenti oblys turǵyndary men qonaqtaryna órt qaýipsizdigi sharalaryn saqtaý qajettigin eskertedi.
