Videodan skrinshot
Aqmolada kiberpolitseiler birneshe alaiaqtyq shemaǵa qatysy bar dropperdi ustady, - dep habarlaidy Polisia.kz.
Batys Qazaqstan oblysy Oral qalasynda Aqmola kiberpolitseileri kem degende úsh alaiaqtyq shemaǵa qatysy bar kúdikti dropperdi ustady. Operatsiia "Anti-Fraud" jedel-aldyn alý is-sharasy aiasynda júrgizildi. 24 jastaǵy kúdikti internet-alaiaqtyqqa qatysyp, ony uiymdastyrýshylar men qatysýshylar arasynda deldal qyzmetin atqarǵan. Ol úshinshi tulǵalardy taýyp, olardyń atyna ártúrli bankterde shottar ashty.
Sol shottardy jábirlenýshilerden urlanǵan aqshany qolma-qol aqshaǵa ainaldyrý úshin paidalanyp, qarjyny qylmystyq shemalardyń uiymdastyrýshylaryna jetkizgen. Sonymen qatar kúdiktiniń SIM kartalardy iske qosýmen de ainalysqany anyqtaldy. Bul kartalar alaiaqtarǵa telefon qońyraýlaryn jasaý jáne azamattardy aldaý úshin qoldanylǵan. Mundai tásil qaskóilerge jeke basyn jasyrýǵa múmkindik berip, olardyń izin tabýdy qiyndatqan. Qazirgi ýaqytta ustalǵan adamnyń kem degende úsh alaiaqtyq epizodqa qatysy rastalǵan.
Sotqa deiingi tergeý sheńberinde politsiia onyń basqa da uqsas qylmystarǵa qatysyn tekserip, zańsyz áreketinen zardap shekken azamattardy anyqtaý jumysyn jalǵastyrýda. Quqyq qorǵaý organdary azamattarǵa qarjylyq operatsiialardy júrgizgende saq bolýǵa, banktik derekterin úshinshi tulǵalarǵa bermeýge, sondai-aq zańsyz nemese "jeńil tabys" usynystaryna kelisýge bolmaitynyn eskertedi.
