Qorǵaljyn aýylynyń turǵyny Serikbai Janybekov óziniń Instagram paraqshasynda qustardy videoǵa túsirip, kópshiliktiń nazaryn aýdardy.
Videony kórgen oqyrmandar tabiǵat kórinisine tamsanyp, jarysa pikir jazdy. Kórermender ásem tabiǵat pen qustardyń keremet sátterin joǵary baǵalap, Serikbaidyń sheberligin maqtady.
Bul video aýyldyń tabiǵi sulýlyǵyn jáne qustar áleminiń tańǵajaiyptyǵyn kórsetip, kópshiliktiń qyzyǵýshylyǵyn týdyrdy.
"Qyzyl kitapqa engen sirek qustardyń biri – alqyzyl qoqiqazdar. Jazda ushatyn az ǵana óńirdiń biri – bizdiń Qorǵaljyn", – dedi video avtory Serikbai Janybekov.
Jeli qoldanýshylary videony qyzý talqylap, pikir bólisti.
"Qandai tamasha kórinis?!", "Óte ádemi. Adamzat tabiǵatty aialańdar. Keremet túsirilim úshin rahmet!", "Qandai ádemi qustar, qandai ádemi mýzykalyq súiemeldeý. Týǵan ólkem – sulýsyń", – dedi oqyrmandar.
Aita keteiik, qoqiqazdar kóktemde elimizdiń soltústik óńirindegi Teńiz kóline jáne Torǵai óńirindegi birneshe kólge jáne Kaspii teńiziniń soltústik-shyǵys jaǵalaýyna ushyp keledi. Qazan-qarasha ailarynda Iran, Aýǵanstan, Pákistanǵa ushyp ketedi. Qyzǵylt qoqiqazdyń dene turqy jumyrlanyp kelgen, aiaqtary men moiyny erekshe uzyn bolady. Olar – dúniejúzindegi aiaǵy eń uzyn qustardyń biri.
Jergilikti turǵyndar qoqiqazdy "qyzylqanat qaz" nemese "qyzylqaz" dep te ataidy. Qanattaryn qaǵyp, ushyp bara jatqan qoqiqazdar alystan qaraǵanda qyp-qyzyl ot tárizdi bolyp kórinedi. Sondyqtan ony oryssha – "flamingo" dep ataidy. Ol latynnyń "alaýlaǵan ot, jalyn" degen sózinen alynǵan. Qoqiqazdar 2010 jyly Qazaqstannyń Qyzyl kitabyna engen.
