Býrabai aýdanynyń Qarashilik aýylynda jeke turǵyn úi órtenip, eki adam kóz jumdy, dep habarlaidy QazAqparat oblystyq Tótenshe jaǵdailar departamentiniń baspasóz qyzmetine silteme jasap.
Vedomstvonyń málimetinshe, órt qyrkúiektiń 9-da keshki saǵat 21:40 shamasynda bolǵan. Qyzyl jalyn 60 sharshy metr aýmaqty sharpydy.
«Órtti sóndirýge TJD jeke quramynan 13 qyzmetker jáne 3 órt sóndirý tehnikasy, Býrabai aýdanynyń TJB jeke quramynan 8 qyzmetker jáne 3 órt sóndirý tehnikasy jumyldyryldy. Órt bolǵan úiden 1969 jylǵy er adam men 1981 jylǵy áieldiń denesi tabyldy», - dedi vedomstvodan.
TJD baspasóz qyzmetinen atap ótkendei, qazirgi kezde sot-meditsinalyq saraptama taǵaiyndalyp, órt bolǵan jerde órt zerthanasy jumys isteýde.
Kýágerlerdiń aitýynsha, qaza tapqandar bul úige shamamen 2 ai buryn kóship kelgen jáne jergilikti qus fabrikasynda jumys istegen.
Osy rette, Aqmola oblystyq Tótenshe jaǵdailar departamentiniń qyzmetkerleri óńir turǵyndaryna elektr symdary men jylytý peshterin jaramdy kúide ustaý qajettigin eskertedi. Sondai-aq, alkogoldi ishimdikterdi shamadan tys paidalaný jáne tósekte temeki shegýge bolmaitynyn eske salady.
