Aqmola oblysynda koronavirýsqa shaldyǵýdyń 100 jaǵdaiy jalpy statistikaǵa enbei qalǵan. Bul týraly óńir ákimi Ermek Marjyqpaev aitty dep habarlaidy "Ult aqparat".
Onyń aitýynsha, oblys koronavirýs boiynsha «qyzyl aimaqqa» endi. Táýliktik ósim orta eseppen 65-70 adamǵa jetip otyr.
Prezidenttiń synyna toqtalǵan ákim «shyn máninde bizdiń oblystaǵy sanitarlyq-epidemiologiialyq mekemeniń shtaty tek 12 adamnan quralǵan. Jappai indetke shaldyǵý bolǵan jaǵdaida málimetterdi zerdeleý sharalaryna mamandar úlgermeidi. 100-ge tarta oqiǵany tirkep úlgermegen. Prezidenttiń syny obektivti, durys dep sanaimyz. Sondyqtan statistika durys túzilýi úshin qajetti sharalardy qabyldadyq», - dedi.
Osy oraida atalǵan 100 oqiǵa resmi statistikaǵa engenin naqtylady.
Eske sala keteiik, koronavirýs indetiniń taralýyna qarsy is-qimyl jónindegi keńeste Prezident Qasym-Jomart Toqaev kei óńirlerde koronavirýs juqtyrý faktilerin jasyrý jaǵdailary kezdeskenin aitty.
«Birqatar oblystarda koronavirýs indetine qatysty jańa jaǵdailardy jasyrý derekteri anyqtaldy. Áńgime Shyǵys Qazaqstan, Soltústik Qazaqstan, Pavlodar, Aqmola, Qostanai jáne basqa da oblystar jaiynda bolyp otyr. Ótirikti shyndai sóiletý asa qaýipti qubylys ekenin túsiný kerek. Óitkeni ol shynaiy qaýiptiń betin búrkemeleidi. Sondai-aq búkil elimiz boiynsha koronavirýs indetine qarsy júrgizilip jatqan kúres strategiiasyna ziianyn tigizedi. Qazirgi ahýal jete baǵalanbai, qabyldanǵan sharalar tolyq júzege asyrylmai otyr. Halyqtyń indetten saqtaný deńgeii tómendep ketken. Bul – aksioma. Mundai jaǵdai álemniń kóptegen elinde baiqalýda. Atalǵan problemanyń bizdiń densaýlyq saqtaý júiemizde de sozylmaly sipat alǵanyn moiyndaýymyz kerek», – dedi Qasym-Jomart Toqaev.
