Aqmola oblysynyń Krasnoiar qonysynda Botai mádenietine tiesili biregei artefaktiler tabyldy, dep habarlaidy QazAqparat.
«Botai» memlekettik tarihi-mádeni mýzei-qoryǵynyń direktory Qýanysh Shaqshaqovtyń aitýynsha, «Botai qonysyndaǵy arheologiialyq ǵylymi-eksperimenttik zertteýler jáne Botai mádenieti tasymaldaýshylarynyń qamtamasyz etý júielerin, ómir saltyn jáne dúnietanymdyq-kieli konteksterin modeldeý» jobasy sheńberinde 2022 jylǵy 1 maýsymnan bastap Zerendi aýdanynyń Krasnoiar aýylynyń janyndaǵy Krasnoiar qonysynda arheologiialyq qazba jumystar júrgizilýde. Krasnoiar qonysyn arheolog Viktor Fedorovich Zaibert 1986 jyly ashyp, ózi 1987 jyly zerttegen.
«Arheologiialyq zertteýler 2021 jyly bastaldy, sodan keiin 148 sharshy metrge qazba jumystary júrgizildi. Mundaǵy maqsat – ǵylymi ádister, janama belgiler men uqsastyqtar arqyly ejelgi botailyqtardyń artefaktilerin, nanymdaryn jan-jaqty jáne egjei-tegjeili zertteý. Sondai-aq, botailyqtardyń alǵashqy (protofilosofiialyq), jartylai mistikalyq ómirlik kózqarastaryn, ómir saltyn zertteý. Ekspeditsiianyń ekinshi mindeti – Qazaqstannyń soltústik óńirindegi Botai mádenietiniń taralý aimaǵyn, biregei arheologiia eskertkishterin zertteý», - deidi Qýanysh Shaqshaqov.
«Botai» memlekettik tarihi-mádeni mýzei-qoryǵynyń direktory atap ótkendei, arheologiialyq qazba jumystary barysynda eki turǵyn úidiń sulbasy anyqtaldy. Olar ári qarai zerttelmekshi. Tabylǵan zattardyń arasynda shaqpaq, súiek jáne qyshtan jasalǵan artefaktiler bar.
«Botai mádenietiniń eneolittik qonystarynyń kóptegen artefaktileri botailyqtardyń keshendi kóp salaly sharýashylyǵynyń bolǵandyǵyn aiǵaqtaidy. Arheologiialyq zertteýler barysynda qyrǵyshtar, balta, jebelerdiń ushtary, darts, pyshaqtar, keramika fragmentteri siiaqty tarihi qundy jádigerler tabyldy. Olardyń arasynda botailyqtar balyq aýlaý úshin paidalanǵan súiek shanyshqy (garpýn), aǵash óńdeý úshin paidalanatyn tas balta, súiekten jasalǵan pyshaq jáne eneolit kezeńindegi taipalardyń dúnietanymdyq kózqarastaryn júzege asyratyn jylqynyń oiý-órnegi bar», - dep tolyqtyrdy Qýanysh Shaqshaqov.
