QR Premer-Ministri Álihan Smaiylovtyń tóraǵalyǵymen ótken Úkimet otyrysynda Qazaqstannyń biylǵy 10 aidaǵy áleýmettik-ekonomikalyq damý qorytyndysy qaraldy, dep habarlaidy "Ult aqparat" primeminister.kz saityna silteme jasap.
Ulttyq ekonomika ministri Álibek Qýantyrovtyń aitýynsha, atalǵan kezeńde respýblikada JIÓ ósý qarqyny 2,5%-dy qurady. Atap aitqanda, ekonomikanyń naqty sektory 2,8%-ǵa, qyzmet kórsetý salasy 1,6%-ǵa ósti. Salalar arasynda aýyl sharýashylyǵy (8,2%), aqparat jáne bailanys (7,1%), qurylys (5%), óńdeý ónerkásibi (4,3%), saýda (4,1%), kólik jáne qoimalaý (3,9%) oń dinamikany kórsetip otyr.
Biylǵy qańtar-qyrkúiek ailarynda eldiń syrtqy saýda ainalymy 35%-ǵa ósip, $98,4 mlrd-ty qurady. Eksport boiynsha kórsetkish 47,5%-ǵa ($63,8 mlrd), óńdelgen taýarlar eksporty 37,5%-ǵa ($19,3 mlrd) ósti. Import $34,6 mlrd-ty qurady (16,5%-ǵa ósken). Jalpy Qazaqstannyń oń saýda teńgerimi $29,3 mlrd-qa jetti (2,2 ese ósken).
Premer-Ministrdiń orynbasary – qarjy ministri Erulan Jamaýbaevtyń derekteri boiynsha, memlekettik biýdjetke 12 trln 427 mlrd teńge kiris tústi (jospar 104%-ǵa oryndaldy). Atap aitqanda, respýblikalyq biýdjet 8,4 trln teńgege (102%), jergilikti biýdjetter 4 trln teńgege (108,5%) tolyqtyryldy. Memlekettik biýdjet shyǵystary 96,7%-ǵa, onyń ishinde respýblikalyq biýdjet shyǵystary 98%-ǵa (14,5 trln teńge), jergilikti biýdjetter shyǵystary 94%-ǵa (8,1 trln teńge) oryndaldy.
Conymen qatar Ulttyq bank tóraǵasynyń orynbasary Berik Sholpanqulov ta baiandama jasady.
Baiandaýshylardy tyńdap bolǵan Premer-Ministr búgingi tańda el ekonomikasy qalypty ósý qarqynyn saqtap otyrǵanyn, naqty sektor ekonomikany turaqtandyrýdyń negizgi faktory retinde damýdyń oń úrdisin kórsetip otyrǵanyn atap ótti. Atap aitqanda, óńdeý ónerkásibindegi óndiris kólemi 4,3%-ǵa, mashina jasaý salasyndaǵy óndiris kólemi 7,7%-ǵa, aýyl sharýashylyǵynda 8%-dan astamǵa ósti.
Álihan Smaiylovtyń aitýynsha, ishki jáne syrtqy investitsiialardy tartý – ekonomikalyq ósýdiń mańyzdy faktory. Jalpy atalǵan kezeńde negizgi kapitalǵa investitsiialardyń ósýi 6,7%-dy qurap otyr.
«Onyń ishinde ekonomikanyń shikizattyq emes salalaryna tartylǵan investitsiia kólemi ulǵaiyp keledi. Investitsiianyń joǵary ósimi jyljymaityn múlikpen jasalatyn operatsiialarda, sondai-aq kólik jáne qoimalaý, aýyl sharýashylyǵy jáne ónerkásipte tirkeldi», — dedi Premer-Ministr.
Úkimet basshysy barlyq negizgi makrokórsetkishter boiynsha Qostanai, Aqmola, Jambyl, Shyǵys Qazaqstan, Qyzylorda oblystarynda, Almaty jáne Shymkent qalalarynda ósim bar ekenin qosa aitty. Eń tómengi qarqyn Ulytaý, Abai jáne Mańǵystaý oblystarynda tirkeldi.
Álihan Smaiylov turaqty damý qarqynyn ustap turý úshin ekonomikany ári qarai ártaraptandyrý, investitsiia tartý jáne turaqty jumys oryndaryn qurý boiynsha jumysty kúsheitý qajettigin atap ótti.
«Óńir ákimdikteri josparlanǵan kórsetkishterdi qamtamasyz etip, investitsiia tartý jumystaryn jandandyrýy qajet. Sondai-aq investitsiialyq jobalardy iske asyrýǵa turaqty monitoring júrgizýi tiis», — dedi ol.
Odan bólek, Premer-Ministr baǵanyń ósýin tejeý jumystaryn turaqty baqylaýda ustaý kerek ekenin aitty. Sebebi azyq-túlik taýarlary baǵasynyń ósýi infliatsiiaǵa aitarlyqtai áser etip keledi.
«Bul, birinshi kezekte, ákimdikter tarapynan qabyldanyp jatqan sharalardyń jetkiliksiz ekenin kórsetedi», — dedi Álihan Smaiylov.
Sóz sońynda Úkimet basshysy óńirler osy jyldyń sońyna deiin áleýmettik-ekonomikalyq damýdyń josparlanǵan kórsetkishterine qol jetkizip, Memleket basshysy qoiǵan mindetterdiń tiimdi iske asyrylýyn qamtamasyz etýi qajettigin atap ótti.
