Almaty oblysynyń ákimdigi Qazaqstannyń on toǵyz millionynshy azamaty atanǵan Jániia Azamatqyzynyń otbasyna 1 million teńgeniń sertifikatyn tartý etti, dep habarlaidy óńir ákimdiginiń baspasóz qyzmeti.
Almaty oblysy ákiminiń orynbasary Arslan Dándibaev pen Ile aýdanynyń ákimi Baǵdat Qarasaev sábidiń otbasymen kezdesti. Sheneýnikter qyzdyń ata-anasyn qýanyshty kúnmen quttyqtap, myqty densaýlyq jáne baqytty ǵumyr tiledi.
Sondai-aq otbasyna oblys ákiminiń atynan quttyqtaý hat pen 1 million teńgeniń sertifikatyn tabystady. Budan bólek, balalar arbasyn, sábi kútimine arnalǵan jiyntyq, jemis-jidek sebeti men basqa da syilyqtar syilady.
Jániianyń ákesi Azamat Nurǵalievtiń aitýynsha, bul búkil otbasy úshin kútpegen oqiǵa boldy.
"Biz basynda sengen joqpyz, qatelesip ketken shyǵar dep oiladyq. Ýchaskelik dáriger habarlasyp, bizdi ákimdik izdep jatqanyn aitqanda ǵana sendik. Biz qyzymyzdy Qazaqstannyń laiyqty azamaty etip tárbieleýge tyrysamyz", - dedi ol.
Al náresteniń anasy Nazgúl Kóbentaeva Jániia ol úshin erekshe bala ekenin atap ótti.
"Jániiany biz bes-alty jyl kúttik. Qyzymyz dúnie esigin ashqan sátten bastap búkil Qazaqstanǵa tanymal boldy, bolashaqta da belgili azamat bolady degen úmittemin", - dedi kelinshek.
20 maýsym kúni Almaty qalasynyń perzenthanasynda Qazaqstannyń 19 millionynshy turǵyny dúniege keldi.
Sábi túngi saǵat ekide týdy, salmaǵy – 4160 gramm , al boiy – 57 sm.
Náresteniń ata-anasy – 1982 jylǵy Azamat Nurǵaliev pen 1986 jylǵy Nazgúl Kóbentaeva Almaty oblysy Ile aýdany Chapaevo aýylynda turady.
Jániia Azamatqyzy – otbasyndaǵy tórtinshi bala.
3 tamyz kúni prezident Qasym-Jomart Toqaev Twitter-de Qazaqstan halqy 19 million adamǵa jetkenin habarlady. Memleket basshysy on toǵyz millionynshy azamattyń ata-anasy men qazaqstandyqtardy osy qýanyshpen quttyqtady.
