Ákimderde jerdi bólý quziretiniń bolýy durys emes. Bul týraly Jer reformasy jónindegi komissiianyń 1-otyrysynda qoǵam qairatkeri Murat Ábenov aitty, dep habarlaidy QazAqparat.
«Jalpy, 2016 jyly qurylǵan memlekettik jer komissiiasynyń óz ýaqytynda qoǵamdaǵy túrli pikirlerdi biriktirip, jer qatynastaryn jetildirý jónindegi negizgi usynystardy eskergenin atap ótkim keledi. Sondyqtan, meniń oiymsha, qazirgi jer komissiiasy óz jumysynda sol usynystardy negizge alýy kerek. Ókinishke qarai, olardyń bir bóligi iske asyrylmai qaldy. Máselen, elde jer resýrstaryn júieli baqylaýdy qamtamasyz etý úshin, biz memlekettik jer inspektsiiasynyń vertikalyn qalpyna keltire almadyq. Sonymen qatar, Jer resýrstaryn basqarý komitetinde tek 38 adamnan turatyn ortalyq apparaty bar. Aimaqtyq jer inspektsiialary jergilikti atqarýshy organdarǵa berilgen. Sonda aýdan ákimi jerdi ózi bóledi, ózi ony baqylaidy. Bul - durys emes», - dedi Aqylbek Kúrishbaev.
Onyń atap ótýinshe, elimizde topyraq-agrohimiialyq zerthanalar jelisin qurý máselesi de sheshilgen joq. Sondyqtan jalǵa berilgen jer telimderiniń topyraq qunarlylyǵy ne bolyp jatqanyn naqty bilmeimiz.
«Ákimdikter aýyldyq eldi-mekenderdi jaiylymdarmen qamtamasyz etý máselesin sońyna deiin sheshe almady. Jer resýrstaryn basqarý komitetiniń málimetinshe, qazir aýyldyń malyn jaiýǵa 32 mln gektardan astam jaiylym jetispeidi. Bul Úkimettiń qaraýyna 2016 jyly jer komissiiasy shyǵarǵan máselelerdiń bir bóligi ǵana, olar áli kúnge deiin túpkilikti sheshimin tappady», - dedi senator.
