Shyǵys Qazaqstan oblysynyń ákimi Danial Ahmetov óńirdegi mektep oqýshylary koronavirýsty kóbine úi jaǵdaiynda juqtyrǵanyn aitty, dep habarlaidy "Ult aqparat".
«Óńirde koronavirýs infektsiiasynyń taralýyna bailanysty kúrdeli jaǵdai saqtalyp otyr. COVID-19 alǵashqy oqiǵasy tirkelgen sátten bastap, 14 402 juqtyrý jaǵdaiy tirkeldi. Oblys aýrýhanalarynda búgin 659 adam jatyr. Aptasyna ortasha ósý qarqyny 1,7 paiyzdy quraidy», - dedi ákim búgin Ortalyq kommýnikatsiialar qyzmetindegi baspasóz máslihatynda.
Sonymen qatar ol oqýshylardyń indetke shaldyǵý jaǵdaiyna qatysty toqtaldy.
«Ókinishke qarai, oqý bastalǵannan beri oblysta oqýshylar arasynda koronavirýstyń 410 oqiǵasy tirkeldi. Onyń ishinde 291 oqýshy qashyqtan, 119 oqýshy 93 mektepte shtattyq rejimde oqydy. Indet tabylǵannan keiin barlyq mektepter jabylyp, oqýshylar qashyqtan oqytýǵa aýystyryldy. Virýs kóbinese úi jaǵdaiynda juqqan. Búgingi tańda oblys aýrýhanalarynda oqýshylar joq», - dedi Danial Ahmetov.
Onyń aitýynsha, tolyq meditsinalyq jabdyqtalǵan 6,2 myń tósek-oryn daiyndaldy. Infektsiialyq bólimderdegi emdelýshiler oksigenoterapiiamen júz protsent qamtylǵan.
Aita keteiik, Shyǵys Qazaqstan oblysy koronavirýs juqtyrý jaǵdailary boiynsha «qyzyl aimaqqa» engen.
