29 qyrkúiekte «Astana» halyqaralyq qarjy ortalyǵynyń (AHQO) basqarýshysy Qairat Kelimbetov islamdyq qarjy salasyndaǵy eń bedeldi Global Islamic Finance Awards (GIFA) syilyǵynyń marapattaý rásimine qatysty, dep habarlaidy QazAqparat.
AHQO úsh joǵary marapatqa ie boldy. «Islam qarjysyna institýtsionaldyq qoldaý kórsetkeni úshin» syilyqty AHQO Basqarýshysy Qairat Kelimbetov aldy. Islam qarjylandyrý departamentiniń direktory Álibek Nurbekov «Islam qarjysy salasyndaǵy saiasatty ázirlegeni úshin» jeke nominatsiiasy boiynsha marapattaldy, AHQO Biýrosy islamdyq qarjy salasyndaǵy «Adam kapitalyn damytý jónindegi bastamalar» úshin atap ótildi.
Islam áleminiń bedeldi syilyǵynyń segizinshi saltanatty rásimi Bosniia jáne Gertsegovina, Saraevo qalasynda ótti. Bul is-shara jyl saiyn túrli elderdiń memleket jáne úkimet basshylary, sondai-aq halyqaralyq islam qarjy institýttarynyń ókilderin bir alańda jinaidy.
«Men GIFA komitetine AHQO-ǵa «Islam qarjysyna institýtsionaldyq qoldaý kórsetkeni úshin» bedeldi syilyǵymen marapattaǵany úshin alǵys bildirgim keledi. Bul marapat bizdi islamdyq qarjylandyrý salasyndaǵy óńirlik hab retinde ortalyqty odan ári ilgeriletýge shabyttandyrady. AHQO-da islam qarjylaryn damytý úshin qolaily ekojúie qurylǵan jáne osy baǵyt AHQO-nyń negizgi basymdyqtarynyń biri bolyp tabylady. AHQO islamdyq qarjylandyrýdy ilgeriletý men damytýda qabyldaǵan bastamalar Global Islamic Finance Report esebine sáikes Islamic Finance Country Index (GIFR 2018) reitinginde Qazaqstan pozitsiialaryn 2017 jyly 31- orynnan 2018 jyly 24- orynǵa jaqsartty» - dedi Q.Kelimbetov.
Aita keterligi, 2017 jyly GIFA tapsyrý rásimi Astana qalasynda ótti. Syilyq aiasynda islam qarjy salasyndaǵy álemniń úzdik kompaniialarynyń tizimi jariialanatyn Global Islamic Finance Report - GIFR jyl saiynǵy jahandyq esebi shyǵarylady. Olardyń qataryna AHQO da endi.
Kásibi qoǵamdastyq qarjy ortalyǵynyń tek Qazaqstan aýmaǵynda ǵana emes, sondai-aq qatysý óńirinde Islamdyq qarjyny damytý jáne kópshilikke taratý salasyndaǵy eńbegin joǵary baǵalady. Qazirgi ýaqytta AHQO infraqurylymynyń bazasynda islamdyq qarjylandyrýdyń tolyqqandy naryǵy qalyptasýda. Aziia Damý banki (ADB), Islam Damý banki (IDB), Islamic Financial Services Board (IFSB), Accounting and Auditing Organization for Islamic Financial Institutions (AAOIFI) jáne General Council for Islamic Banks and Financial Institutions (CIBAFI) siiaqty halyqaralyq uiymdardyń qoldaýymen úzdik islam qarjy tájiribeleri men standarttaryna sáikes qolaily quqyqtyq jáne normativtik baza quryldy.
Kásibi bastamalardy ilgeriletý jáne damytý sheńberinde AHQO Biýrosy álemdik jetekshi qarjy institýttarmen áriptestikte bes halyqaralyq sertifikattyq baǵdarlama boiynsha oqytý júrgizedi. Olar: Islam bankingindegi jáne BIBF qarjysyndaǵy halyqaralyq sertifikattaý, CISI islamdyq qarjy salasyndaǵy kásibi biliktilik, INCEIF islamdyq qarjylaryndaǵy kásibi sertifikattaý, islam qarjy salasyndaǵy BIBF keńeitilgen diplomy, sertifikattalǵan AAOIFI Islam kásibi býhgalteri.
AHQO Biýrosynyń bastamasymen biyl 4 shildede Islam ekonomikasy forýmy barysynda naryq kásipqoilarynyń tiimdi ózara is-qimylyn qamtamasyz etýge baǵyttalǵan islam qarjysyndaǵy kásipqoilar qaýymdastyǵy quryldy. Jyl saiyn Islamic Finance Week salalyq is-sharasy ótkiziledi, ol óz alańynda tájiribe almasý jáne búkil óńirde islamdyq qarjy ainalasynda ekojúieni qurý úshin islam qarjy indýstriiasyndaǵy sarapshylardy, mamandar men qarjy institýttaryn biriktiredi.
«GIFA-nyń úsh bedeldi nagradasyn alý halyqaralyq qaýymdastyq tarapynan joǵary baǵa berýdi kýálandyrady jáne óńirlik islamdyq qarjylandyrý haby retinde AHQO ustanymyn nyǵaitady, sondai-aq osy baǵyttaǵy serpindi damý úshin jańa túrtki beredi», - delingen habarlamada.
