© Sputnik / Abzal Kaliev
Búgin Parlament Májilisi otyrysynda áielder men balalardyń quqyǵyna qatysty zań jobasynyń birinshi oqylymy ótti. Onda depýtat Ermurat Bapi «Otaǵasy týraly zań qabyldaýymyz kerek shyǵar" degen pikir bildirdi, dep habarlaidy «Ult Aqparat».
Májilis depýtaty Ermurat Bapi óz kezeginde baiandamashy depýtat Juldyz Súleimenovaǵa saýal tastady. Aitýynsha, áielderdiń quqyqtary men balalardyń qaýipsizdigin qamtamasyz etýge baǵyttalǵan jańa zań jobasy qoǵamdaǵy ákeniń rólin tómendetip jiberýi múmkin.
«Juldyz bike, osy zań jobasyn oqi kelip, osy jerdegi pikirtalas retinde máseleni taldai kelgende, osy zań jobasynan biz ákeniń rólin, er azamattyń rólin, zań jobasynyń tabiǵatynan, motivynan ákeniń rólin súmireitip jibergen joqpyz ba? Osy jóninde jeke pikirińizdi bilgimiz keledi... Qazaqstanda halyqtyń 70 paiyzyn qazaqtar quraitynyn bilemiz. Osy jerde otyrǵandarymyzdyń bárimizdi «osydan ákeń kelsin, ákeń sazaiyńdy beredi» degen tárbiemen óstik qoi. Osy turǵydan kelgende biz ákeniń, er azamattyń rólin kóterý úshin otaǵasy týraly zań qalydaýymyz kerek shyǵar?», - dedi Ermurat Bapi.
Májilis otyrysynda depýtat Amanjol Áltai da er adamdardyń quqyǵyn qorǵaý týraly aitty.
Eske salsaq, atalǵan zań jobasynyń tanystyrylýynda depýtat Anas Baqqojaev «otbasynda janjal áieldiń tiliniń uzyndyǵynan týyndaidy» dep aitqan bolatyn.
ULT.KZ tilshisi májilismen Juldyz Súleimenovadan áielder men balalardyń quqyǵyna qatysty zań jobasy talqylanǵan saiyn ne úshin ylǵi depýtat myrzalar er azamattardyń quqyǵyn aityp shyǵady dep surady.
"Bul zań jobasyn komitetterde de talqyladyq qoi. Komitetterde oń qorytyndysy bolmasa birinshi oqylymda talqylaýǵa bolmaidy. Biz bas kezinde komitetterge barǵanda alańdaýshylyq boldy. Jańa Ermurat Bapi myrza da suraq qoidy ǵoi, sondyqtan da, árine, er depýtattar emes, jalpy qoǵamdaǵy bar másele sekildi. Biraq bir máselege toqtalǵym keledi. Bizde qazir Qylmystyq Kodekske 108-1 baby engizilip otyr. Ol "densaýlyqqa qasaqana ziian keltirý" baby Ákimshilik quqyqbuzýshylyq týraly kodeksten alynyp, Qylmystyq Kodekske engizilip otyr. Sáikesinshe jaza da Qylmystyq Kodekspen retteletin bolady. Budan keiin, uryp-soǵý baby da Ákimshilik Kodekste bolǵan, endi bul qylmystyq kodekske engizilip otyr. Biraq bul eki bap ta tek qana áielder men balalardyń quqyǵyna baǵyttalǵanymen, ol barlyq azamattardy qamtitynyn atap ótkimiz keledi. Eger er azamattardyń da densaýlyǵyna qasaqana ziian keltiriletin bolsa, osy baptardyń aiasynda quqyqtary qorǵalatyn bolady", - dep jaýap berdi Juldyz Súleimenova.
Juldyz Súleimenova osy tusqa muqiiat nazar aýdarýdy surady. Sondai-aq bul zań tuńǵysh ret qabyldanyp jatqandyqtan, túsinbestikter bolatynyn aityp ótti.
"Bizde áielderdiń turmystyq vandalizm kezinde qaitys bolý faktileri bar. Olar júzdep sanalady. Sondyqtan da bul ozbyrlyqty toqtatýǵa zańnamalyq negizde osyndai qadamdarǵa baryp otyrmyz", - dedi Juldyz Súleimenova.
