Tarihty aqtarsaq mádenietimizdiń biik deńgeide ekenin anyq sezinýge bolady. Elbasynyń «Uly dalanyń jeti qyry» maqalasyna qatysty kóppen birge folklortanýshy, Halyqaralyq Túrki akademiiasynyń ǵylymi qyzmetkeri, filologiia ǵylymdarynyń kandidaty Aqedil Toishanuly da pikirin bildirdi, dep habarlaidy QazAqparat tilshisi.
«Jalpy, budan buryndaǵy Elbasynyń «Tarih tolqynynda» degen eńbeginde de tarihqa boilaý, jas urpaqqa ult tarihyn uqtyrý máselesi qamtylǵan. Ol eńbek 1999 jyly jazylǵan bolatyn. Atalmysh kitabynda Prezident túrkiniń etnogenezi, ulttyq kody, tarihi zerde týraly atap ótedi. Al bul maqalada Prezident bárin yqshamdap, qazaqtyń mádenieti men rýhaniiatyn jańasha tyń derektermen, ozyq tásildermen zerdeleý týraly óziniń júieli kózqarasyn bildirip jatyr. Maqalanyń mánisi - el tarihy men mádenietin, ónerin zertteýdiń, tanyp-bilýdiń zamanýi ádis-tásilderin usynyp otyrǵandyǵynda», - deidi Aqedil Toishanuly.
Folklortanýshy ǵalym atap ótkendei, jalpy, bizdiń úlken tarihymyzdy Elbasy ýaqyt pen keńistik aiasynda tutastyqta tujyrymdap tekserip otyr.
«Biz halyq retinde baǵzy ǵasyrlardan beri kele jatyrmyz da, keńistik retindegi qazaqtyń Uly dalasynda ómirimiz jalǵasyp keldi. Biz osy dalanyń tólderimiz. Bizdiń basqaǵa uqsamaityndyǵymyz da, ereksheligimiz ben artyqshylyǵymyz da osy Uly dalamen, onyń dáýirler men zamanalar kelbetinde tolǵatyp týdyrǵan ata dástúrmen bailanysty. Bizdiń mádeniet osy Uly dalanyń jomart ári qatal tabiǵatyna bailanysty qalyptasqan. Altaidan Atyraýǵa deiin, Ertisten Edilge deiingi alyp aýmaqta baǵzy zamannan tabany taimai, ar-namysy alasarmai birtutas halyq ómir súrip keledi. Osy Uly dala halqyn folkor, ortaq tarih, ańyz-ápsana, shejire syndy rýhaniiattyń san taraýy bailanystyryp jatyr», - deidi folklortanýshy.
Aqedil Toishanulynyń aitýynsha, Elbasy tek qazaq halqynyń atynan ǵana emes, kóshpendiler qaýymy halyqtarynyń atynan óz oiyn bildirgen.
«Prezident Kóshpendiler órkenietiniń ókili retinde sóilep otyr. Mysaly, Altai órkenieti, Altai mádenieti desek, anaý úlken temir qorytý dáýirinen bastap kele jatqan halyqtar ózin Altaidyń ulanymyz, Altaidyń tólimiz dep aitady. Elbasy Uly dala degende sózin sonaý Altaidan bastaýynyń ózindik máni bar. Qazaqtyń buryn kigen kiim-keshegi, shalbary, babalarymyzdyń qarý jaraǵyna deiin - Uly dala halyqtarynyń mádenietiniń muralary. Elbasy bul jerde bóle-jara emes, tutastyq, birlik, yntymaq turǵysynan sóiledi. Tarihty aqtarsaq, tutastyqta teksersek mádenietimizdiń, shyndyǵynda, qaýqarly ekenin anyq sezinýge bolady», - dep túidi Aqedil Toishanuly.
.jpeg)