Jiger úige jylap kirdi. Solq-solq etedi. As úide shái iship otyrǵan áke-sheshesi qolyndaǵy keselerin ústel ústine asyǵys qoia saldy.
- Balam, saǵan ne boldy? – dep, báiek bolǵan Kúliia anasy janyna keldi. Balasynyń qoldary sýyqtan búrisip ketipti. Jigerdiń qyzarǵan saýsaqtaryn anasy jyp-jyly alaqanymen jylytty. Syrt kiimin sheshti.
- Bireý tiisti me, nege jylaisyń? – dedi ákesi Jeńis ulynyń kóńilsiz kúiin kórip.
- Kim tiiser deisiń? Qarashy, qoldary tońǵań soń jylaǵan ǵoi. Qolǵabyń qaida, balam?
- Qaltamda. Syrǵanaq teýip, sý bolyp qaldy.
- Qar ustaǵansyń ǵoi, - dedi sheshesi Jigerdiń kúrteshesiniń qaltasynan móldir muz qatqan jún qolǵabyn sýyryp jatyp.
- Muzǵa qulap qalmadyń ba?
- Qulaǵam joq. Biraq Qalibek...
- Qalibek tiisti me? – dedi ákesiniń qabaǵy túksiip.
- Eshkim tiisken joq. Qalibek ekeýimiz dospyz. Qalibek aitady «kóktemde Qazaqstanǵa kóshemiz» dep. Botagózder de kóshedi eken.
- Kóshse ne bolady? - dedi sheshesi Jigerge eshkim tiispegenin bilgen soń kóńili ornyna túsip.
- Olar týǵan elge qaitamyz, - deidi.
- Soǵan bola jylai ma eken?
Jiger kóziniń jasyn súrtti. Ákesi gazet oqýǵa kiristi.
- Áke, biz de elge qaitaiyqshy! – dedi Jiger ótinip.
Jeńis ákesi gazetten bas alyp, balasyna qarady.
- Nege? – dep surady ákesi.
- Dostarymnyń bári ketip qalatyn boldy, - dedi Jiger. – Men de dostarymmen birge týǵan jerge barǵym keledi.
- Biz Qytaida týdyq qoi, balam. Áli-aq jańa dostar tabasyń.
Jiger ókpelep qaldy. Shirkin, qazir ákesiniń orynda bolsa ǵoi, baiaǵyda týǵan jerge kóship keter edi.
- Men Qazaqstanda turǵym keledi, - bala jylamsyrap. – Biz de keteiikshi, áke!
- Ol jaqta ne bar? Biz osynda turyp úirenip kettik. Sen hanzý tilin jaqsy meńgerip kelesiń. Bári jaqsy bolady, balam.
- Qazaqstanda ma? Ol jaqta jańa Astana bar. Bizdiń kók týdyń túsi maǵan qatty unaidy. Kún astynda búrkit bar. Aýyldaǵy Syrymnyń búrkiti siiaqty.
- Jaraidy, balam, bosqa sóilei bermei, jylynyp sháiińdi ish, - dedi Kúliia sheshesi.
- Biz de kóshemiz ba? – dedi Jiger áke-sheshesine alma-kezek qarap. Ata-anasy úndemedi. Bala olardyń kelispegenin túsindi.
- Qarnym ashqan joq, - degen Jiger burtiyp bólmesine kirip ketti.
Jiger tósegine jatyp, armandai bastady. «Men óskende áke–sheshemdi alyp, elime kóshemin. Bárimiz Qazaqstanda turatyn bolamyz» dep tátti qiialǵa berildi. Sálden soń maýjyryp, uiyqtap ketti. Tús kórdi.
Qazaqstanda júr eken deidi. Mine, ózi armandaǵan Astanany qyzyqtap, erkin aralap júr. Ertegidegi biik «Báiterekke» shyǵyp, ainalaǵa zer saldy. Bul jerden Astana qalasy alaqanǵa salǵandai kórinedi eken. Mundai qýanbas. Áne, qol sozym jerde prezident jumys isteitin «Aqorda», anaý jerde «Hanshatyr» oiyn-saýyq otaýy. Kózdiń jaýyn alatyn ásem ǵimarattar, tómende syńǵyrlaǵan Esil ózeni qandai keremet. Kenet kóshe boiynan tanys eki balany kórdi. Oi, mynaý Qalibek pen Botagóz ǵoi.
- Qalibek, Botagóz, men mundamyn, - dep jyltyr áinek ishinen qol bulǵady. Olar «Báiterekke» qarap tursa da, belgi bermedi. Dostarymnan adasyp qalmaiyn dep Jiger tómenge tústi. Ekeýi uzap ketken eken. Sońdarynen qýyp keledi.
- Qalibek, Botagóz, toqtańdarshy! Bul men ǵoi, Jigermin! – dep aiǵailady. Biraq dostary estimeidi. Qatty aiǵailap edi, óz daýysynan oianyp ketti. Qarasa, janynda anasy tur eken.
- Jiger, balam, aýyryp qalǵan joqsyń ba? – dep mańdaiynan ustap kórdi. – Oibýý, ystyǵyn kóterilip tur ǵoi. Qazir dári bereiin.
- Dári ishkim kelmeidi, - dedi Jiger kúrk-kúrk jótelip. - Emdelmeseń bolmaidy. Káni, myna dárini aýyzyńa sal da, sý iship jiber. Tez jazylyp ketesiń.
- Men túsimde Qazaqstandy kórdim. Jazda qydyryp baraiyqshy. Dostarymmen oinaýǵa baramyn. Jarai ma? - dedi Jiger.
- Jaraidy, eger sabaǵyńdy jaqsy oqysań, Qazaqstanǵa týysshylap baryp qaitamyz.
Jiger kúlimsiredi. Basy qatty aýyryp turǵanyn sezdi. Túimedei aq dári men kese toly sýdy iship aldy. Óne-boiy janyp barady.
- Ákesi, beri kelshi. Jiger aýyryp qalypty, - dedi Kúliia anasy. Janyna ákesi kelip, halin surady.
- Áke, apam jaqsy oqysań jazǵy demalysta Qazaqstanǵa baramyz dedi. Bárimiz baramyz ǵoi, iá? – dedi Jiger.
- Jaqsy. Sen tezirek jazyl, - dedi ákesi Jeńis kúlimsirep.
- Sheshe, meniń dostaryma «Jiger jazda Qazaqstanǵa barady» dep aitshy.
- Jaraidy balam, aitaiyn, - dedi anasy. Jiger qýanyp qaldy. Áke-sheshesi as úige ketken. Bala ornynan turyp, kompiýterdiń aldyna jaiǵasty. Ǵalamtordy ashyp, ata-babasynyń týǵan jeri týraly tanysa bastady.
- Men saǵan oiyn oinama, sabaǵyńdy oqy degenim qaida? – dedi ákesi kóńili tolmai. Bul kezde kógildir ekran betinde Qazaqstannyń kók týy jelbirep tur edi.
Ashat Ómirbaev
