جٸگەر ٷيگە جىلاپ كٸردٸ. سولق-سولق ەتەدٸ. اس ٷيدە شەي ٸشٸپ وتىرعان ەكە-شەشەسٸ قولىنداعى كەسەلەرٸن ٷستەل ٷستٸنە اسىعىس قويا سالدى.
- بالام, ساعان نە بولدى? – دەپ, بەيەك بولعان كٷلييا اناسى جانىنا كەلدٸ. بالاسىنىڭ قولدارى سۋىقتان بٷرٸسٸپ كەتٸپتٸ. جٸگەردٸڭ قىزارعان ساۋساقتارىن اناسى جىپ-جىلى الاقانىمەن جىلىتتى. سىرت كيٸمٸن شەشتٸ.
- بٸرەۋ تيٸستٸ مە, نەگە جىلايسىڭ? – دەدٸ ەكەسٸ جەڭٸس ۇلىنىڭ كٶڭٸلسٸز كٷيٸن كٶرٸپ.
- كٸم تيٸسەر دەيسٸڭ? قاراشى, قولدارى توڭعاڭ سوڭ جىلاعان عوي. قولعابىڭ قايدا, بالام?
- قالتامدا. سىرعاناق تەۋٸپ, سۋ بولىپ قالدى.
- قار ۇستاعانسىڭ عوي, - دەدٸ شەشەسٸ جٸگەردٸڭ كٷرتەشەسٸنٸڭ قالتاسىنان مٶلدٸر مۇز قاتقان جٷن قولعابىن سۋىرىپ جاتىپ.
- مۇزعا قۇلاپ قالمادىڭ با?
- قۇلاعام جوق. بٸراق قاليبەك...
- قاليبەك تيٸستٸ مە? – دەدٸ ەكەسٸنٸڭ قاباعى تٷكسيٸپ.
- ەشكٸم تيٸسكەن جوق. قاليبەك ەكەۋٸمٸز دوسپىز. قاليبەك ايتادى «كٶكتەمدە قازاقستانعا كٶشەمٸز» دەپ. بوتاگٶزدەر دە كٶشەدٸ ەكەن.
- كٶشسە نە بولادى? - دەدٸ شەشەسٸ جٸگەرگە ەشكٸم تيٸسپەگەنٸن بٸلگەن سوڭ كٶڭٸلٸ ورنىنا تٷسٸپ.
- ولار تۋعان ەلگە قايتامىز, - دەيدٸ.
- سوعان بولا جىلاي ما ەكەن?
جٸگەر كٶزٸنٸڭ جاسىن سٷرتتٸ. ەكەسٸ گازەت وقۋعا كٸرٸستٸ.
- ەكە, بٸز دە ەلگە قايتايىقشى! – دەدٸ جٸگەر ٶتٸنٸپ.
جەڭٸس ەكەسٸ گازەتتەن باس الىپ, بالاسىنا قارادى.
- نەگە? – دەپ سۇرادى ەكەسٸ.
- دوستارىمنىڭ بەرٸ كەتٸپ قالاتىن بولدى, - دەدٸ جٸگەر. – مەن دە دوستارىممەن بٸرگە تۋعان جەرگە بارعىم كەلەدٸ.
- بٸز قىتايدا تۋدىق قوي, بالام. ەلٸ-اق جاڭا دوستار تاباسىڭ.
جٸگەر ٶكپەلەپ قالدى. شٸركٸن, قازٸر ەكەسٸنٸڭ ورىندا بولسا عوي, باياعىدا تۋعان جەرگە كٶشٸپ كەتەر ەدٸ.
- مەن قازاقستاندا تۇرعىم كەلەدٸ, - بالا جىلامسىراپ. – بٸز دە كەتەيٸكشٸ, ەكە!
- ول جاقتا نە بار? بٸز وسىندا تۇرىپ ٷيرەنٸپ كەتتٸك. سەن حانزۋ تٸلٸن جاقسى مەڭگەرٸپ كەلەسٸڭ. بەرٸ جاقسى بولادى, بالام.
- قازاقستاندا ما? ول جاقتا جاڭا استانا بار. بٸزدٸڭ كٶك تۋدىڭ تٷسٸ ماعان قاتتى ۇنايدى. كٷن استىندا بٷركٸت بار. اۋىلداعى سىرىمنىڭ بٷركٸتٸ سيياقتى.
- جارايدى, بالام, بوسقا سٶيلەي بەرمەي, جىلىنىپ شەيٸڭدٸ ٸش, - دەدٸ كٷلييا شەشەسٸ.
- بٸز دە كٶشەمٸز با? – دەدٸ جٸگەر ەكە-شەشەسٸنە الما-كەزەك قاراپ. اتا-اناسى ٷندەمەدٸ. بالا ولاردىڭ كەلٸسپەگەنٸن تٷسٸندٸ.
- قارنىم اشقان جوق, - دەگەن جٸگەر بۇرتيىپ بٶلمەسٸنە كٸرٸپ كەتتٸ.
جٸگەر تٶسەگٸنە جاتىپ, ارمانداي باستادى. «مەن ٶسكەندە ەكە–شەشەمدٸ الىپ, ەلٸمە كٶشەمٸن. بەرٸمٸز قازاقستاندا تۇراتىن بولامىز» دەپ تەتتٸ قييالعا بەرٸلدٸ. سەلدەن سوڭ ماۋجىرىپ, ۇيىقتاپ كەتتٸ. تٷس كٶردٸ.
قازاقستاندا جٷر ەكەن دەيدٸ. مٸنە, ٶزٸ ارمانداعان استانانى قىزىقتاپ, ەركٸن ارالاپ جٷر. ەرتەگٸدەگٸ بيٸك «بەيتەرەككە» شىعىپ, اينالاعا زەر سالدى. بۇل جەردەن استانا قالاسى الاقانعا سالعانداي كٶرٸنەدٸ ەكەن. مۇنداي قۋانباس. ەنە, قول سوزىم جەردە پرەزيدەنت جۇمىس ٸستەيتٸن «اقوردا», اناۋ جەردە «حانشاتىر» ويىن-ساۋىق وتاۋى. كٶزدٸڭ جاۋىن الاتىن ەسەم عيماراتتار, تٶمەندە سىڭعىرلاعان ەسٸل ٶزەنٸ قانداي كەرەمەت. كەنەت كٶشە بويىنان تانىس ەكٸ بالانى كٶردٸ. وي, مىناۋ قاليبەك پەن بوتاگٶز عوي.
- قاليبەك, بوتاگٶز, مەن مۇندامىن, - دەپ جىلتىر ەينەك ٸشٸنەن قول بۇلعادى. ولار «بەيتەرەككە» قاراپ تۇرسا دا, بەلگٸ بەرمەدٸ. دوستارىمنان اداسىپ قالمايىن دەپ جٸگەر تٶمەنگە تٷستٸ. ەكەۋٸ ۇزاپ كەتكەن ەكەن. سوڭدارىنەن قۋىپ كەلەدٸ.
- قاليبەك, بوتاگٶز, توقتاڭدارشى! بۇل مەن عوي, جٸگەرمٸن! – دەپ ايعايلادى. بٸراق دوستارى ەستٸمەيدٸ. قاتتى ايعايلاپ ەدٸ, ٶز داۋىسىنان ويانىپ كەتتٸ. قاراسا, جانىندا اناسى تۇر ەكەن.
- جٸگەر, بالام, اۋىرىپ قالعان جوقسىڭ با? – دەپ ماڭدايىنان ۇستاپ كٶردٸ. – ويبۋۋ, ىستىعىن كٶتەرٸلٸپ تۇر عوي. قازٸر دەرٸ بەرەيٸن.
- دەرٸ ٸشكٸم كەلمەيدٸ, - دەدٸ جٸگەر كٷرك-كٷرك جٶتەلٸپ. - ەمدەلمەسەڭ بولمايدى. كەنٸ, مىنا دەرٸنٸ اۋىزىڭا سال دا, سۋ ٸشٸپ جٸبەر. تەز جازىلىپ كەتەسٸڭ.
- مەن تٷسٸمدە قازاقستاندى كٶردٸم. جازدا قىدىرىپ بارايىقشى. دوستارىممەن ويناۋعا بارامىن. جاراي ما? - دەدٸ جٸگەر.
- جارايدى, ەگەر ساباعىڭدى جاقسى وقىساڭ, قازاقستانعا تۋىسشىلاپ بارىپ قايتامىز.
جٸگەر كٷلٸمسٸرەدٸ. باسى قاتتى اۋىرىپ تۇرعانىن سەزدٸ. تٷيمەدەي اق دەرٸ مەن كەسە تولى سۋدى ٸشٸپ الدى. ٶنە-بويى جانىپ بارادى.
- ەكەسٸ, بەرٸ كەلشٸ. جٸگەر اۋىرىپ قالىپتى, - دەدٸ كٷلييا اناسى. جانىنا ەكەسٸ كەلٸپ, حالٸن سۇرادى.
- ەكە, اپام جاقسى وقىساڭ جازعى دەمالىستا قازاقستانعا بارامىز دەدٸ. بەرٸمٸز بارامىز عوي, يە? – دەدٸ جٸگەر.
- جاقسى. سەن تەزٸرەك جازىل, - دەدٸ ەكەسٸ جەڭٸس كٷلٸمسٸرەپ.
- شەشە, مەنٸڭ دوستارىما «جٸگەر جازدا قازاقستانعا بارادى» دەپ ايتشى.
- جارايدى بالام, ايتايىن, - دەدٸ اناسى. جٸگەر قۋانىپ قالدى. ەكە-شەشەسٸ اس ٷيگە كەتكەن. بالا ورنىنان تۇرىپ, كومپيۋتەردٸڭ الدىنا جايعاستى. عالامتوردى اشىپ, اتا-باباسىنىڭ تۋعان جەرٸ تۋرالى تانىسا باستادى.
- مەن ساعان ويىن ويناما, ساباعىڭدى وقى دەگەنٸم قايدا? – دەدٸ ەكەسٸ كٶڭٸلٸ تولماي. بۇل كەزدە كٶگٸلدٸر ەكران بەتٸندە قازاقستاننىڭ كٶك تۋى جەلبٸرەپ تۇر ەدٸ.
اسحات ٶمٸرباەۆ
