Qazaq elindegi saiasi matritsa biliktegi keibir tulǵalardyń is-áreketinen ǵana ózgeriske ushyraitynyn kózi qaraqty aǵaiyn jaqsy biledi. Onyń ózi kóldiń betinde sheńber-sheńber iz qaldyrǵandai ǵana álsiz deńgeide. Bizde máselen, ashyq pikirtalas, ártúrli partiialar ia bilik opponentteriniń "ótkir" málimdemeleri saiasi axýalǵa túk áser etpeidi. Saiasattyń baǵytyn buratyn Elbasymyzdan basqa joǵarǵy jaqta tulǵa deitin kóp kisimiz de joq. Al, sol kóldiń betin jai dirildetip qana qoimai, kerek kezde tolqyta da alatyn, qajet kezde álgi kólge asaý-asaý ózenderdi buryp ákep, aidynnyń sýyn jańartyp turatyn az tulǵalarymyzdyń biri hám biregeii kim dese, kez kelgen qazaq ol - Imekeń der edi. Jáne bul ádil baǵa. Halyq arzan piar, ustanymsyz is-áreket, nemquraidy qimyl-qozǵalystyń barlyǵyn sol zamatta-aq sezip-bilip otyrady. Halyqty aldaý qanshalyqty qiyn bolsa, onyń maxabbaty men senimine ie bolý sonshalyqty kúrdeli dúnie. Kóz aldynda tek ulttyń múddesi, urpaqtyń bolashaǵy turǵan adamnyń júreginde ǵana asyl oi, batyl sheshim paida bolatyny aqiqat. Sebebi, nátije - niet pen áreketke bailanysty.
Kei adamda túisikten (instinkt) bólek passionarlyq talshyq bolady. Bul Táńirdiń syiy hám synaǵy. Passionarlyq áýelide túisiktiń sózin tyńdamai, óz iesin jarǵa jyǵatyndai da kórinip ketýi bek múmkin. Bul ásirese, saiasatta júrgen tulǵa úshin asa qaýipti-qaterli. Alaida, tulǵanyń passionarlyǵy - tarix pen taǵdyrdyń missiiasy úshin berilgendikten, túisiktiń ózi Kókte jazylǵan pesheneni egjei-tegjeili bilmei jatady. Biz osy bir passionarlyq energiiany Imekeńniń boiynan kórgendei bolamyz. Memleket qairatkeri retindegi ǵumyrnamasyna kóz júgirtseńiz, kóz jetkizer edińiz. Elbasynyń senimdi sardary ári serigi ol eshqashan attan túsken emes. Sebebi, Prezident adam tanityn kisi. Oǵan Táýelsiz memlekettiń irgetasyn qalasatyn ishki energiiasy mol qairatkerler kerek bolatyn. Tańdaý Tasmaǵambetov sekildi at tóbelindei shoǵyrǵa tústi jáne olar qoldan kelgenshe basshysyna kómektese bildi, elge qyzmet etti. Keide anaý-mynaý dep synap-minep jatamyz. Durys, qatelikter bar. Qatelikter bar bolsa, demek jumys bar. Bul ómir, jáne siz ben bizdiń ómir. Siz ben bizdiń dáýir. Biz osy ózgeristerdiń kýásimiz, jańa ýaqytyń tynysymen ǵumyr keship jatqan adamdarmyz. Sol sebepten, kóp nársege salmaqty oi, saralanǵan pikirmen qaraǵanymyz abzal. Keide men ózime mynandai suraq qoiamyn: dál qazir meni bir orynǵa qonjityp otyrǵyzyp qoisa, men qanshalyqty deńgeide óz mindetimdi sapaly oryndai alamyn? Oǵan meniń ómirlik hám eńbek tájiribem jete me? Olai oilaitynymyz: xalyqtyń taǵdyryna jaýapty bolýǵa qaýqarymyzdy salmaqtaǵanymyz. Halyqtyń taǵdyryna jaýapty bolý - qoi baǵý emes.
Bizdiń Táýelsiz zamanymyzdaǵy eldiń taǵdyryna eleýli áser etkenderdiń biri osy - Imekeń. Áli de qolynan kelgen sharýany istep júr. Sol úshin raxmet aitalyq. Imanǵali Tasmaǵambetov - Alashtyń, Táýelsizdiktiń "ónimi". Ol bizdiń Qazaqtyń ishinen túlep ushqan suńqar. 60 jyldyq mereitoiy qutty bolsyn! Jaqsy jas, Imekeń zor abyroimen jetken tamasha beles. Áli de Imekeńe Táńir Otanymyzdyń, Ultymyzdyń ósip-órkendeýine eńbek etýge zor densaýlyq, qajymas qairat-qýat, uzaq ǵumyr násip etsin dep tiledik!
Aqberen Elgezek
.jpeg)