Bir kózim jetkeni - jaman adam bolmaidy eken. Nadan adam ǵana bolady. Adamnyń jaman bolmaityny - onyń Avtorynyń minsizdiginen. Nadan bolatyny - ǵumyr atty saparǵa shyqqanda Avtor bergen barlyq jaqsy qasietterin nadan asha almai ketetindikten. Nemese sol jaqsy qasietterin tunshyqtyra bergendikten. Ómirdi nadan kózben kóretindikten. Bárin ózindei, óziniń tanym-túsinigine salyp qaraityndyqtan, qate qabyldaityndyqtan. Óziniń qarańǵy úńgirdei álemine kirip alyp, sonyń qaýipsizdigin, myzǵymastyǵyn, ózgermes qalpyn qamtamassyz etýge baryn salatyndyqtan, ony qorǵaityndyǵynan, syrttan esh jańalyq kirgizbeitindikten.
Nadandyqtyń jaýy - bilimdi adam. Óitkeni nadan adamǵa bilimdi adam qý sekildi, pysyq sekildi kórinedi. Biraq taǵy bir pále bar: bilimdiniń bárin adam deýge kelmeidi. Bilimdiniń ishinde de órkenietti nadandar jetip artylady. Al, ondai bilimdi nadandar jyrtqysh ańnan da qaýipti. Ol bilimmen qarýlanǵan nadan. Álemmen soǵysatyn qarýy óz zamanyna laiyq. Ony jeńý óte qiyn. Sondyqtan ondai bilimdi nadandardyń dáýreni uzaq júrip turady.
Sonda nadan emes adam kim deisiz ǵoi. Ol ilimdi adam. Alla bergen álmisaqtyq, illáhi taza qasietterin boiynan erte sezip-bilip, ózin ábden zerttep, sol arqyly qorshaǵan ortany tanyp, tabiǵat-tirshilikti jaratqan Avtordyń kórkem sheberligine aýyzy ańtaryla tańqalyp kórgen adam. Osy bir sulýlyqtyń Avtoryna áýeli qurmet sezimi, sosyn mahabbaty oianǵan adam. Mahabbat arqyly jaratylysty zertteýge, tanýǵa umtylǵan adam. Dúnieaýi bilimdi tolyqtyryp, ǵylymnyń jańa belesterin baǵyndyratyn adam. Eliniń órkendeýine, jeriniń gúldenýine óz sanaly ǵumyryn arnaýǵa beiil adam. Sebebi ol óz Otanyna qyzmet etýge paryzdar ekenin uǵynǵan adam.
Kórkem Avtordan qoryqqannan (nadan oiana bastaǵanda qorqady) emes, súiip, qurmettegendikten durys ómir súrýge umtylǵan, kúná jasaýǵa Absoliýtten uialǵan adam. Uiaty bar adam. Arly adam. Ómir súrý etikasyn (qiianat jasamaý, ótirik aitpaý, aldamaý, jan dúniiasyn taza ustaý t.b.) tolyq meńgergen adam. Ol adam. Ol pendeden joǵary. Áýlieden tómen bolsa da, durys adam. Úlgili adam. Olar teginde qazaqta kóp bolýy kerek.
Ondai adamdar otbasyndaǵy tárbieden qalyptasady. Balabaqsha, mektep, kolledj, ýniversitet bermeidi ondai bilimdi. Ata-anasy ǵana óziniń súiikti balasyna bere alady ondai tárbieni. Sebebi, oǵan jaqsylyq tileidi, adam bolsa eken deidi. Jamandyqqa qimaǵan soń, baryn beredi.
Demek ata-ana birinshi bop óz boiyndaǵy nadandyqpen kúresýge bel sheshe kirisý kerek. Sonda biz ainaldyrǵan 2-3 býyn almasqanda izgilikke jaqyn qoǵam qalyptastyra alamyz. Qazaqty ult retinde saqtap qalatyn osy. Sebebi nadandyqtyń baratyn jeri - quldyq.
Ilimdi qaidan alamyz degender ainaladaǵy uly kitap - tirshilikke júrek kózimen, kóńil janarymen qarasyn. Ainalada Avtordyń qoltańbasy shýaq shasha menmundalap tur.
Eń túzý aina - osy. Betińdi tyrjitpai kúlimsirep qarasań, dúniia shirkin de saǵan kúlimdep qaraidy. Óitkeni ol da, siz sekildi Avtordyń meiiriminen jaratylǵan. Al, meiirimdilik pen názik plastika kez kelgen qatty dúnieni ilei alady. Osyny uǵyndyń ba, odan keiin seniń aldynda eshqandai kedergi joq dep eseptei ber, qatelespeisiń...
Aqberen Elgezek
.jpg)