Osydan 10-15 jyl buryn Máskeýdegi M.Gorkii atyndaǵy ádebiet institýtyna oqýǵa túsip, qazaq ádebietiniń klassikteri Ábdildá Tájibaev, Muqaǵali Maqataev, Jumeken Nájimedenov, Oljas Súleimenov, Qalihan Ysqaq, Sáken Júnisov, Tynymbai Nurmaǵanbetov, Ákim Tarazi, Marfýǵa Aithojina, Iran Ǵaiyp, Ulyqbek Esdáýlet, Aigúl Kemelbaeva siiaqty aǵa-apalarymdai men de «Joǵary ádebi kýrstaryn» bitirip kelýdi armandaýshy edim.
Tipti, qaibir jyly M.Gorkii institýtynyń túlegi Rollan Seisenbaev meni sol jerge túsirem dep rektoryna habarlasyp, biraz álektengen bolatyn. Obalyna ne kerek, ol jaqtan bizdiń jeke basymyzǵa esh qarsylyq bola qoiǵan joq. Bizdi shetelden kelip oqityndarǵa institýt tarapynan qoiylǵan talaptary, anyǵyraq aitqanda oqýǵa tólenetin aqshasynyń kólemi toqtatyp tastap edi.
Joldamamen top etip túse qalatyn Keńes zamanyndai jaǵdai joq. Qysqasy, bolmady. Biraq, qalaida basqa eshteńemen ainalyspai, tek ádebiet salasyndaǵy bilimimdi jetildirý – úlken armandarymnyń biri bolyp júretin. «Bolashaqpen» oqýǵa til bilmeimiz. Jasymyz bolsa 40-qa taiady. Til meńgergenmen jas kelmeidi. Anamen-mynamen ainalysyp júrgende, ýaqyt qasqa shaýyp óte shyqty. Bul sharýa bir ret beriletin fáni ómirde endi oryndalmaityn arman bop qalatyn boldy ǵoi dep júretinmin.
Sóitip júrgenimizde Qudai aidap, Jazýshylar Odaǵyna jumysqa keldik. Bul jerde asa kóp múmkindik bolmaǵanymen, aitatyn minber bar. Ádebietke qajetti sharýalardy joǵary jaqqa aitýǵa jaǵdailar týdy degendei. Ile-shala Mádeniet jáne sport Ministri janynan qurylǵan Jas qalamgerlerdiń respýblikalyq keńesi quryldy.
Barshańyz kýásizder, Keńestiń birinshi otyrysynda Ortalyq Aziia Ádebiet Akademiiasyn qurý jóninde usynysty ortaǵa saldym. Jastarǵa sondai bir oqý orny qurylsa, sol jerde olar óz bilimderin jetildirse degen syńaida. Maqsat – álginde aitqan armanymyzdy jastar kórsin degen niet.
Sol usynysymyzdy búgin talantty aqyn inim Merei Qart Elbasynyń aldynda qaitalap aitty. Kórdik. Jaraisyń, Merei!
Bul usynys ta, ózge usynystar sekildi Úkimettiń josparyna kiredi dep senemin.
Endigi mindet - osy úlken jobany biz oilaǵandai, biz qiialdaǵandai etip júzege asyrý.
Akademiia qurylyp, onyń oqý baǵdarlamasy tiisti deńgeide uiymdastyrylsa, bul bizdiń ádebietimizdi jańa belesterge kótereri sózsiz. Sebebi, ádebietke kelip jatqan jastar ýniversitetter men ózge de oqý oryndarynda alǵan bilimderine qosa taza ádebi-gýmanitarlyq bilim alsa, olar bolashaqta uly shyǵarmalar jazatyny anyq.
Bul Akademiianyń fakýltetterinde deimiz be, bólimshelerinde deimiz be oqyp jatqan jas ádebietshilerge ózimizdiń múiizi qaraǵaidai klassikterimiz dáris oqyp, qazirgi internettiń bar múmkindikteri arqyly nemese Akademiiaǵa arnaiy shaqyrylǵan álemge áigili qalamgerler, filosoftar, mádeniettanýshylar, ónertanýshylar, dintanýshylar, jaratylystaný ǵylymdarynyń ozyq oily ǵalymdary lektsiia oqysa, otandyq jáne shetel klassikteriniń jeke-jeke sheberhanalary jumys istep tursa, bul jas aqyn-jazýshylardyń intellektýaldyq deńgeiin múlde basqa keńistikke shyǵaryp jiberer edi.
Oi – osy. Oryndalýy – joǵary deńgeide bolsyn dep tilep otyrmyz. Sonda ǵana biz básekege qabiletti, erteń adamzatqa úlken oi aita alatyn, álemdi óziniń shyǵarmalarymen tánti ete alatyn, qazaqtyń rýhani álemin barlyq boiaýlarymen qulpyrta kórsetip, pash ete alatyn, ulttyq ádebietimizdiń álemdegi ornyn senimdi bekitip beretin erekshe tolqyndy, múlde aiyryqsha býyndy tárbielei alar edik. Al, bul óz kezeginde qazaqtyń oi-órisin jańa asqarlarǵa shyǵaratyny aqiqat.
Aqberen Elgezektiń feisbýktaǵy jazbasynan
