«Aq jol» demokratiialyq partiiasy parlamentarizm institýttaryn kúsheitýdi jáne kezeń-kezeńimen prezidenttik júieden parlamenttik respýblikaǵa kóshý bastamasyn qoldaidy, dep habarlaidy QazAqparat.
«Biýrokratiia men qarapaiym azamattardyń bilikten tys qalýyna qarsy eń tiimdi qural – memlekettik organdardyń ashyqtyǵy men qoǵam aldyndaǵy esep berýi, iaǵni demokratiia. Demokratiia parlamentarizmniń negizgi institýttary bolyp sanalatyn parlament jáne jergilikti máslihattar arqyly qoǵamdyq múddelerdi alǵa jyljytý printsipine súienedi. Demokratiia degenimizdiń ózi – parlamentarizm.
«Aq jol» demokratiialyq partiiasy parlamentarizm institýttaryn kúsheitýdi jáne kezeń-kezeńimen prezidenttik júieden parlamenttik respýblikaǵa kóshý bastamasyn qoldaidy. Qazirgi kezeń bilik monopoliiasynan memlekettik máselelerdi sheshýde balama pikirlerdi eskeretin tepe-teńdik júiesine josparly túrde kóshý múmkindikterin týǵyzdy», - dedi «Aq jol» demokratiialyq partiiasynyń tóraǵasy A. Perýashev partiia quryltaiynda.
Azat Perýashev Qazaqstanǵa Ulttyq senim keńesi ǵana emes, Ulttyq senim Úkimeti de qajet dep esepteidi.
«Qazirgi Konstitýtsiiaǵa sáikes, prezident biliktiń barlyq tarmaqtarynyń ózara is-qimylyna kepil bolady. Bul prezident figýrasynyń parlament pen úkimetten birdei qashyqtyqta bolýy qajettigin bildiredi. «Aq jol» demokratiialyq partiiasy Úkimet quramyn Memleket basshysy emes, parlamenttik sailaýda jeńiske jetken partiia bekitýi tiis dep esepteidi, partiia tizimdi Prezidentke bekitýge usynady jáne óz úkimetiniń barlyq jetistikteri men sátsizdikteri úshin jaýapty bolady. Damyǵan demokratiialardyń tájiribesi osyndai», - dedi partiia tóraǵasy.
Aita keteiik, «Aq jol» demokratiialyq partiiasynyń XVI sailaýaldy quryltaiynda partiianyń sailaýaldy baǵdarlama jobasy usynyldy. Partiia tóraǵasy Azat Perýashev baǵdarlamadaǵy eń negizgi basymdyq – Táýelsizdik jáne Alash ulttyq ideiasy ekenin atap ótti.
Sonymen birge, «Aq jol» demokratiialyq partiiasy Qazaq Respýblikasy ataýyn qaitarýdy usyndy.
