Qazaqstannyń «Aq jol» demokratiialyq partiiasy Jambyl oblysy Qordai aýdanyndaǵy jaǵdaiǵa bailanysty málimdeme jasady, dep habarlaidy "Ult aqparat".
«Aq jol» demokratiialyq partiiasy Jambyl oblysynyń Qordai aýdanynda bolǵan qaiǵyly oqiǵalarǵa bailanysty qaza bolǵandardyń týystary men jaqyndaryna kóńil aityp, zardap shekkenderdiń tezirek saýyǵyp ketýin tileidi.
«Sondai-aq biz osynaý qantógiske sebep bolǵan arandatýshylardyń áreketterin aiyptaimyz. Biz qoǵamda etnosaralyq kelisimdi saqtai otyryp, barlyq ult ókilderin sabyr men ózara qurmetke shaqyramyz. Osy jaǵdaiǵa bailanysty úkimettik komissiia quryldy. Atalǵan oqiǵanyń mán-jaiyn, onyń neden bastalǵanyn, politsiia ókilderine shabýyl jasaǵan kinálilerdi jáne aimaqtaǵy birqatar aýyldarda adam qurbandary bolýy, ǵimarattardyń órtelýi men tonalýynyń aq-qarasyn osy komissiianyń anyqtaýyn suraimyz. Osy oqiǵalardy bastaýshylar zań aldynda qatań jaýapkershilikke tartylýy tiis» dep málim etti partiia.
Uiymnyń jazýynsha, memlekettik komissiia qaiǵyly jaǵdaidyń saldaryn joiý barysynda kezekti sharalarmen shektelmeýi kerek.
«Bul janjal jergilikti bilik organdary men turǵyndar arasynda ózara túsinistiktiń joqtyǵyn, quqyq qorǵaý organdarynyń bedeli tómen ekenin kórsetti. Onyń artynda áleýmettik problemalardyń jatqany aiqyn. Jergilikti memlekettik organdar halyqqa jaqyndaý úshin, halyqtyń áleýmettik máselelerin sheshý úshin birqatar sharalar qabyldaýy qajet. Biz memlekettik komissiianyń jumysy men onyń sheshimderi halyqqa túsinikti jáne aqparattyń ashyq bolýyn talap etemiz», - deidi partiia basshylyǵy.
Sondai-aq, olar barlyq azamatty qoǵamdyq kelisimdi qorǵaýǵa, respýblika zańdary men Konstitýtsiiasyn qoldanýǵa shaqyrady.
