Búgin «Qazaq Respýblikasynyń 100 jyldyǵy jáne onyń qurylýyna «Alash» qairatkerleriniń qosqan úlesi» taqyrybynda onlain konferentsiia ótti. Ǵalymdar jiyndy uiymdastyrǵan «Aq jol» demokratiialyq partiiasyna alǵys aitty, dep habarlaidy QazAqparat.
«Biz ata-babalarymyzdyń ótken jolyn ulyqtaýǵa tiispiz. «Qazaq Respýblikasynyń 100 jyldyǵyn erekshe atap ótip jatqan «Aq jol» demokratiialyq partiiasynyń barlyq múshesine kóp alǵys bildiremiz. Eń bastysy – elimizdiń tarihyn nasihattaýǵa «Aq jol» demokratiialyq partiiasynyń qosyp júrgen úlesi zor ekenin bárimiz bilemiz. Ǵalymdar jinalǵan jerde jaqsy usynystar aitylady, biz de óz pikirimizdi qosaiyq», - deidi tarih ǵylymdarynyń doktory, professor Aqqali Ahmet.
Onyń aitýynsha, Qazaq Respýblikasy qurylǵan kezde qazaq eli óte kúrdeli kezeńdi basynan keshirip jatty.
«Biz áli kúnge deiin Alash ziialylarynyń eńbegin elep, durys dáriptei almai kelemiz. Ár oblys óz tulǵalaryn ǵana tanýmen ainalysyp jatqandai. Shyn máninde Álihan Bókeihanov bolsyn, Halel Dosmuhamedov, Ýálihan Tanashev, Mustafa Kókebaev bolsyn – osylardyń báriniń aty Atyraýdan Altaiǵa deiingi qazaq eliniń kóshelerine, mektepterine, ýniversitetterine, qala berdi aýyl kóshelerine berilýi tiis. Ókinishke qarai, kei turǵalar eskerýsiz qalyp jatyr», - deidi professor.
