Ulttyq baspasóz ulttyq tarihty tanytýǵa, eldiktiń berik irgesin nyǵaitýǵa úlken eńbek atqardy. Bul týraly «Aq jol» gazeti materialdarynyń 25 tomdyq jinaǵynyń tusaýkeserinde aityldy, dep habarlaidy "Ult aqparat".
«Jas urpaq ata-babamyzdyń jasaǵan eńbegin, murasyn kórip ósse - sanalyq urpaq bolyp ósedi dep oilaimyn. Bizdiń ǵalym, tarihshy, qoǵam qairatkerlerine elimiz úshin jasap jatqan eńbegi úshin alǵys aitamyn», - deidi Mádeniet jáne sport ministriniń orynbasary Nurǵisa Dáýeshov.
Ol Mádeniet jáne sport ministri Aqtoty Raiymqulovanyń osy týyndynyń shyǵýyna muryndyq bolǵan mamandarǵa aitqan alǵysyn jetkizdi.
«Alash ziialysy Ahmet Baitursynuly «Bizdiń zamanymyz - ótken dáýirdiń perzenti, keler zamannyń – atasy» degen eken. Táýelsizdik jolynda kúresip ótken uly balalarymyz naǵyz erjúrek, danyshpan bolǵan. Eshbir el ótken tarihy men búgingi kúnnen sabaq almai keleshegin jasai almas. Egemendiktiń jańa lebi men qazaq tarihyndaǵy uly tulǵalardyń esimi jańǵyrdy. Keshegi keńestik saiasat halyq jadynan ótken tarihymyz ben sol tarihty jasaǵan qairatkerderimizdi tanytýǵa jol ashpady. Osy turǵydan kelgende biz uly tulǵalarymyzdy umytýdyń az-aq aldynda qaldyq. Bizdiń bul joldan qutqaryp, óshkenimizdi jandyryp, ólgenimizdi tiriltken - táýelsizdik. Sonymen qatar, bul orynǵa qazaq baspasózin de jatqyzýǵa bolady. Ulttyq baspasóz ulttyq tarihty tanytýǵa, eldiktiń berik irgesin nyǵaitýǵa úlken eńbek atqardy. Ótken ǵasyrdyń bas kezinde jaryq kórgen «Aq jol» gazetiniń maqalalarynan quralǵan kóptomdyq kitaptyń tarihi-tanymdyq turǵydan qaraǵanja shyn máninde sanaly oqyrman qaýymǵa bereri mol. Ondaǵy alash ziialylarynyń ótkir oilary kúni búginge deiin ózekti ekenin eshkim joqqa shyǵara almaidy. Memleket jáne qoǵam qairatkeri Názir Tóreqululynyń qazaq jáne orys tilinde jaryq kórgen tańdamaly shyǵarmalary, Azamat soǵysy órshigen 1914-1919 jyldar aralyǵynda qazaq ólkesindegi ken óndirý oryndarynda bes jyl qyzmet atqaryp, alash jurtynyń tynysh-tirshiligi, salt-dástúr, ádet-ǵurpyn hatqa túsirgen aǵylshyn injeneri Djon Volfordtyń úsh tilde jaryq kórgen eńbegi, Arman Ahmetovtyń «Ábilmámbet han áýleti» eńbegi keshegi keńestik saiasattyń kesirinen umyt bolǵan tarihi tulǵalarymyzdy keńinen tanytady. Bul jolda «Aq jol» demokratiialyq partiiasy, qoǵam qairatkeri Hanbibi Esenqaraqyzy, L.Gýmilev atyndaǵy Eýraziia ulttyq ýniversiteti, «Alash» zertteý institýty, «Alashorda» qoǵamdyq qory ókilderi edáýir eńbek sińirgenin atap ótýimiz kerek. Atalǵan týyndylardyń bolashaq urpaqqa bereri mol», - delingen Aqtoty Raiymqulovanyń lebizinde.
