Parlament Májilisiniń jalpy otyrysynda «Aq jol» fraktsiiasynyń depýtattary qala mańyndaǵy iri eldi mekenderdiń damý kontseptsiiasyn qaita qaraýdy usyndy, dep habarlaidy "Ult aqparat".
«Elimizde sońǵy jiyrma jylda turǵylyqty mekenjaiyn aýystyryp, kóshkenderdiń sany kúrt ósti. Statistika komitetitiniń esebine júginsek, ótken jyldyń birinshi jartysynda 500 myńnan astam Qazaqstan azamaty el ishinde qonys aýdarǵan. Osynyń nátijesinde Qazaqstan qalalarynda halyq kóp shoǵyrlanǵan aglomeratsiialar men jańa aýyldar paida boldy. Mysaly, sońǵy 10 jylda Shymkent qalasynyń mańyna 500 myńnan asa halyq taban tirese, Shyǵysta Óskemen qalasynyń burynǵy saiajailary qazir 100 myńnan asatyn turǵyny bar qala mańyndaǵy aýylǵa ainaldy. Bul ýrbanizatsiia protsesi elimizdiń barlyq oblysyna tán. Sarapshylardyń pikirinshe, ishki migratsiia ary qarai ósetin bolady», - dedi depýtat Berik Dúisenbinov Úkimet basshysy Asqar Maminniń atyna joldaǵan saýalynda.
Osy oraida ishki migratsiia kóptegen áleýmettik máseleni týǵyzyp otyr.
«Astanamyzdyń ainalasyndaǵy turǵyndarynyń sany 25 myńnan 50 myńǵa deiin jetetin jańa aýyldarda áli kúnge deiin jastar bos ýaqytynda basqosý ótkizetin, sportpen shuǵyldanatyn birde-bir sportzal nemese mádeniet oshaǵy salynbaǵan. Jeńis pen jeńilistiń dámin tatpaǵan, sportpen shynyqpaǵan, tárbiesi kem bolǵan jasóspirim rýhani da, fizikalyq turǵydan da nashar, ózine senimsiz, osal bolady. Ózi siiaqtylardan top quryp, qaltasyna pyshaq salyp, qylmysqa barýynyń bir sebebi de osy. Qarańǵyda toptalyp kóshe kezbei, qurdastarymen birge kókpar tartyp, boz kilemde kúresip, alańda fýtbol oinap, sporttyń ashy terin tatqan bozbala qylmysker bolmas edi. Óitkeni sport degen – qarsylasyn qurmettei bilýdi úiretetin tárbie kózi... Osy oraida, bul problemamen tek quqyq qorǵaý organdary ǵana ainalysyp, onyń shyn sebepteri kólenkede qala bere me?», - dedi depýtat.
Bul turǵyda «Aq jol» depýtattary ishki migratsiia máselesine bailanysty jergilikti ákimdikter men Úkimetti tiisti qadamdar jasaýǵa shaqyrdy.
«Bizdiń oiymyzsha, qala mańyndaǵy, aýyldardan kelgen jastarǵa qymbat, quny milliardtan asatyn saltanatty sport sarailary emes, qoljetimdi, tegin isteitin sportzaldar, mektepterdiń múmkindigin paidalanýǵa jol ashýymyz kerek», - dedi Berik Dúisenbinov.
Osy aitylǵandardy eskere otyryp, Nur-Sultan, Almaty, Shymkent aglomeratsiialarynyń jáne oblys ortalyqtaryn qorshaǵan iri eldi mekenderdiń damý kontseptsiiasyn qaita qaraý usynyldy.
«Ulttyq múddeni eskerip jáne jergilikti turǵyndarmen aqyldasa otyryp, qala mańyna ornalasqan halyq sany kóbeiip kele jatqan aýyldardy qoljetimdi, paidalanýǵa yńǵaily, qarapaiym mádeni jáne sport obektilerimen qamtamasyz etýdiń jańa baǵdarlamasyn qabyldaýdy suraimyz», - dedi depýtat.
