AQSh amerikalyq infraqurylymǵa (kommertsiialyq spýtnikter de kiredi) jasalǵan kez kelgen soqqyǵa jaýap beredi. Bul jóninde 27 qazanda AQSh ulttyq qaýipsizdik keńesiniń ókili Djon Kirbi málimdedi, dep habarlaidy Azattyq.
AQSh qalai jaýap beretinin naqtylamady. Kirbidiń aitýynsha, Resei spýtnikterdi joiatyn júiege ie bolýǵa talpynyp otyr.
27 qazanda Resei syrtqy ister ministrliginiń qarýdy taratpaý jáne baqylaý departamenti jetekshisiniń orynbasary Konstantin Vorontsov "Resei Ýkraina soǵysynda paidalanylyp jatqan kommertsiialyq spýtnikterdi zańdy soqqy nysany retinde qarastyrady" dep málimdegen edi.
Kirbi beisenbi kúni Vashingtondaǵy brifing kezinde AQSh prezidenti Djo Baiden 15–16 qarashada Indoneziiada ótetin "Úlken jiyrmalyq" sammiti aiasynda Resei basshysy Vladimir Pýtinmen kezdesýdi josparlap otyrmaǵanyn aitty. Buǵan deiin AQSh prezidenti Pýtinmen kezdeskisi kelmeitinin birneshe ret málimdegen.
Pýtin sammitke qatysatynyn resmi túrde rastamady. 27 qazanda ol túpkilikti sheshim qabyldamaǵanyn aitty. Biraq sammitke Resei ókilderi mindetti túrde qatysatynyn jetkizdi.
Áskeri sarapshylar Ýkrainadaǵy soǵysta kommertsiialyq júie ónimderi de qoldanylyp jatqanyn atap ótedi. Ýkraina armiiasy milliarder Ilon Masktiń Starlink spýtnikterin ózara bailanysqa, barlaý derekterin alýǵa qoldanyp jatyr. Bailanyspen Viasat kompaniiasy qamtamasyz etken.
