Aqtaý teńiz-saýda porty ýaqyt ótken saiyn óziniń tasymaldaý qýatyn arttyryp keledi. Júkterdi aýystyryp tiep, birqatar tasymaldardy qabyldap, munai jáne munai ónimderi, metall, qurǵaq júkterdi alys jolǵa attandyryp, qarbalasyp jatatyn port ailaqtary qazir elimizde ósirilgen astyqty belsendi eksporttaýda.
Qazaq dalasy – altyn astyqtyń alqaby. Eldiń yryzdyq-nesibesine orai, astyq qory mol jiylyp, ony tipti álemniń 46 eline eksporttaý múmkindigine ie ekendigimizdi maqtanyshpen aitýǵa bolady. Qazirgi tańda Aqtaý teńiz-saýda portyndaǵy «Aq bidai» terminaly qaýyrt jumys ústinde. Olar jýyrda qazaqstandyq birneshe bidai eksporttaýshylarmen kelisimge otyrǵan Iranǵa bidai jóneltýde.
– Qazir «Aq bidai» astyq terminaly tolyq óndiristik qýatymen jumys jasap tur. Qazaqstandyq bidai eksporttaýshylardyń sany toǵyzǵa jetti. Olarmen 100 myń tonnadan astam astyq jóneltý týraly kelisimshart jasalǵan bolatyn. Biz jyl sońyna deiin jumysymyzdy turaqty júrgizetin bolamyz, – deidi «Aq bidai-terminal» AQ basqarma tóraǵasy R.Galiamov.
Jaǵalaýda baýyryn sýǵa tósep turǵan sý kólikterine júkti tieýdiń de óz ádis-tásilderi bar. Ony jaqsy túsinetin mamandar óz isterin sheber atqarýǵa ábden mashyqtanǵan. Munda keme bir jaǵyna aýyp ketpeýi úshin júkti bir jerge úimei, jaiyp tieý syndy qarapaiym jumystar da operatorlardyń qolymen túime arqyly basqarylady eken.
Astyq tieý úshin kemelerdiń arnaiy kestesi jasalǵan. Qazaqstandyq jáne irandyq kemeler aýyr júkti teńdep, kók teńiz ústimen jolǵa shyǵýda.
Iran eliniń júk kemesiniń jalpy syiymdylyǵy 2500 tonna, ailaqta saǵatyna kemelerge 350 tonna bidai júkteledi. Aqtaý teńiz-saýda portyna kúnine temir jol arqyly 50 vagon astyq jetkizilse, porttan bir aida 60 myń tonna, bir jylda 600 myń tonna bidai júktelip, shetelderge shyǵarylady.
Sapasy joǵary Qazaqstan bidaiyna shetelderden suranys arta túsýde. Qazirgi tańda astyq tasymaldaýda óz mindetin minsiz atqaryp turǵan Aqtaý teńiz-saýda porty áli talai tonna aq bidaidy eksportqa shyǵaryp, el ekonomikasyna ózindik úlesin qosa túsetin bolady.
Gúlaiym ShYNTEMIRQYZY,
«Egemen Qazaqstan»
Mańǵystaý oblysy
.jpeg)