Aitysker aqyn Saltanat Ótelbaeva men onyń jubaiy Myrzabek Qasymovtyń qaza tapqan jol apaty týraly tyń derek shyqty, dep habarlaidy ult.kz.
Qaiǵyly oqiǵa 16 maýsym kúni tańǵy saǵat 07:00 shamasynda Aqmola oblysyndaǵy Astana – Atbasar – Jaqsy avtojolynyń 231-shaqyrymynda bolǵan.
Politsiia málimetinshe, tasjolda Chevrolet Tracker jeńil kóligi men KamAZ júk kóligi betpe-bet soqtyǵysqan. Apat saldarynan jeńil kóliktiń júrgizýshisi men jolaýshysy oqiǵa ornynda kóz jumdy. Keiin olardyń Saltanat Ótelbaeva men onyń jubaiy ekeni belgili boldy.
Sondai-aq jol apatynan taǵy eki adam túrli dene jaraqatyn alyp, meditsinalyq kómekke júgingen.
Aldyn ala málimet boiynsha, Qostanaida tirkelgen KamAZ Astana baǵytyna karer jumystaryna arnalǵan shamamen 20 tonna jarylǵysh zat tasymaldap bara jatqan. Júrgizýshiniń qaýipti júk tasymaldaýǵa ruqsaty bolǵan, al kólikte kúzetshi de bolǵan.
Tergeýdiń aldyn ala boljamyna sáikes, Chevrolet Tracker qarsy qozǵalys jolaǵyna shyǵyp ketken. Quqyq qorǵaý organdary jeńil kólik júrgizýshisiniń rólde qalǵyp ketýi múmkin degen nusqany da tekserip jatyr.
Apattan keiin jarylys nemese órt bolmaǵan. Oqiǵa ornynda tótenshe jaǵdailar qyzmetteri jumys istep, aýmaq qorshaýǵa alyndy. Qazir jol-kólik oqiǵasyna bailanysty sotqa deiingi tergeý júrgizilip jatyr.
