QR Indýstriia jáne infraqurylymdyq damý ministrliginiń Azamattyq aviatsiia komiteti reisterdiń keshigýi, jolaýshy quqyǵynyń buzylýy jáne azamattardan kóptegen ótinish túsýine bailanysty jariialanǵan tergeýdiń nátijesin málim etti, - dep habarlaidy KTK telearnasy.
Jolaýshylar arasynda rezonans týdyrǵan reistiń keshigý derekterine bailanysty 18 shildede Komitet tóraǵasy Talǵat Lastaev "Eir Astana" áýe kompaniiasymen shuǵyl jinalys ótkizdi. Jiyn barysynda aviakompaniiaǵa áýe kemelerin kommertsiialyq josparlaýdaǵy kemshilikteri kórsetilip, turaqty reisterdiń oryndalmaýyna jol bermeý týraly aityldy. Sonymen qatar, áýe kemeleriniń jedel aýystyrylmaýy, reisterdiń keshigýi kezinde aviakompaniia qyzmetkerleri tarapynan jyldam túsindirmelik jumystardyń júrgizilmeýi syndy kemshilikteri kórsetildi.
Jinalys qorytyndysy boiynsha "Eir Astana" áýekompaniiasy rezervti qamtamasyz etý úshin turaqty reister keshiktirilgen kezde ǵana paidalanylatyn arnaiy jeke áýe kemesin bóldi. Qazaqstandyq iri aviakompaniialardyń aktsioneri retinde "Samuryq-Qazyna" UÁQ" AQ áýe kemelerin alýdy josparlaý jónindegi jumysty kúsheitýi qajettiligi aityldy.
21 shildede ózara is-qimyldy nyǵaitý maqsatynda "Qazaqstannyń aviatsiialyq ákimshiligi" AQ, "Eir Astana" aviakompaniiasy, Almaty jáne Oral qalalary áýejailarynyń qatysýymen keńester ótkizildi.
16 shildege josparlanǵan Almaty - Male reisiniń uzaq keshigýine bailanysty jedel túrde eki kún ishinde tergeý júrgizildi. Onyń qorytyndysy boiynsha osy reistiń jolaýshylary 15 saǵattan artyq ushýdy kútkendigi anyqtaldy. Reisti kútý kezinde jolaýshylarǵa "Qazaqstan Respýblikasynyń áýe keńistigin paidalaný jáne aviatsiia qyzmeti týraly" QR Zańynyń 86-babynyń 1-bóliginde kózdelgen qyzmetter, atap aitqanda qonaq úide turý boiynsha qyzmetter tiisti túrde usynylmaǵan.
Osyǵan orai 2022 jylǵy 21 shildede aviakompaniiaǵa qatysty ákimshilik is qozǵalyp, aviakompaniiaǵa 1 000 AEK (1 AEK = 3 063 tg) mólsherinde aiyppul salyndy.
Osy ýaqytqa deiin Komitetke barlyǵy 150-ge jýyq ótinish kelip tústi, olardyń árqaisysy boiynsha anyqtaý jumystary júrgizilip jatyr. Onyń nátijesi boiynsha qoldanystaǵy zańnamada kózdelgen tiisti is sharalar qabyldanatyn bolady.
Kodekstiń 567-babynyń 1-bóligine sáikes, tasymaldaýshynyń Qazaqstan Respýblikasynyń áýe keńistigin paidalaný jáne aviatsiia qyzmeti týraly zańnamada kózdelgen tasymaldaýshynyń kinásinen nemese áýe kemesiniń kesh kelýinen, tasymaldaý marshrýtynyń ózgerýi saldarynan reis oryndalmaǵan nemese keshikken jaǵdaida jolaýshyǵa qyzmetter kórsetý jónindegi mindetterdi oryndamaýy nemese tiisti deńgeide oryndamaýy kezinde 200 AEK mólsherinde aiyppul salynady.
Sondai-aq, osy baptyń birinshi tarmaǵynda kórsetilgendei, ákimshilik jaza qoldanylǵannan keiin bir jyl ishinde qaitalap jasalǵan is-áreketke (áreketsizdikke) 1 000 AEK mólsherinde aiyppul salynady.
