Búgin, 16 qańtarda, QR Mádeniet jáne aqparat ministri Aida Balaevanyń qatysýymen Almatyda turatyn ádebiet pen óner qairatkerlerine memlekettik stipendiia tabystaldy. Bul týraly QR Mádeniet jáne aqparat ministrligi habarlaidy.
Memleket basshysynyń ókimine sáikes, 2024 jyly memlekettik stipendiiaǵa 75 adam ie boldy.
Aida Balaeva stipendiia iegerlerin quttyqtap, olardyń qazaq mádenietin damytýǵa zor úles qosqanyn atap ótti. Ministr shyǵarmashylyq ziialy qaýym mádeni biregeilikti saqtaý, el birligin nyǵaitý jáne ulttyq qundylyqtardy nasihattaý isinde mańyzdy ról atqaratynyn aitty.
«Prezident Qasym-Jomart Kemeluly Toqaevtyń ulttyq rýhaniiat týraly únemi aityp, onyń eldik jolyndaǵy orasan kúshi men mol múmkindikterine qoǵamnyń nazaryn aýdaryp júrgeni málim.
Jyldaǵy halyqqa arnaǵan Joldaýlary, Ulttyq Quryltaidaǵy bastamalary, túrli suqbattarynyń ózeginde – Táýelsizdik pen Otanshyldyq, Birlik pen Yntymaq, Ádildik pen Jaýapkershilik, Zań men Tártip, Jasampazdyq pen Jańashyldyq siiaqty búgingi Qazaqstanǵa aýadai qajet qundylyqtar jatyr!
Halyqty birlikke shaqyrý, tatýlyqty nyǵaitý, jas urpaqqa izgi qundylyqtardy sińirý – mine, bul siz ben bizdiń, iaǵni, ziialy orta men memlekettiń ortaq múddesi», – dedi ministr.
Aida Balaeva Memleket basshysynyń barlyq bastamalary eń aldymen ult birligin qalyptastyrýǵa, memleketti nyǵaitýǵa jáne azamattardyń ál-aýqatyn arttyrýǵa baǵyttalǵanyn atap ótti.
«Eldiktiń mártebesin arttyrýda ózderińizdei mádeniet maitalmandaryna, shyǵarmashyl qaýym ókilderine júkteler mindettiń de aýqymy zor. Árine, osy jolda ziialy qaýym ókilderi Prezidentimizge tirek bolyp, qashanda qoldaý bildiretindigine kúmánimiz joq. Eń bastysy – osy igi baǵytta judyryqtai jumylyp, el múddesi úshin aianbai qyzmet etý. Memleket óz tarapynan mádeniet maitalmandarynyń shyǵarmashylyǵyn qoldaýdy júieli túrde jalǵastyra beredi», – dedi ministr.
Stipendiia iegerleri qatarynda Asanáli Áshimov, Bibigúl Tólegenova, Oljas Súleimenov, Iranbek Orazbaev, Nurǵali Núsipjan, Tuńǵyshbai Jamanqulov, Merýert Ótekesheva, Amandos Aqanaev, Dýlat Isabekov, Tólen Ábdikuly, Tatiana Tarskaia, Gýlver Razieva jáne basqa da kórnekti mádeniet qairatkerleri bar.
